صفر مصري جديد في الحفاظ علي التراث الثقافى صفر زى واحد من الاصفار الكتيرة اللي حققتها مصر في الفترة الاخيرة ....كل مرة بنتكلم عن الاهمال اللي هو السبب الحقيقي في كل صفر...زمان كنا بناخد في الحساب ان صفر دا ولا بيقدم ولا بيأخر وياسلام لو حطيته جنب اي رقم علي شماله يبقي ملوش قيمة اصلا تخيل بقا اما ناخد صفر في كل حاجة يبقي اكيد ملناش قيمة....ودى مش المشكلة مشكلتنا الحقيقية اننا مبنتعلمش مبندورش علي السبب ونعالجه لا بننسي وبنسامح وبنكبر دماغنا لغاية ما الاهمال بقا صفة ملازمة وبقا طبيعي انك تسمع عن صفر جديد كل يوم بس السؤال اللي دايما ملوش اجابة لمصلحة مين منحسنش اوضاعنا ونفضل نكتسب صفر ورا صفر..؟! زهرة الخشخاش اتسرقت يارجالة اي والله دا خبر حقيقي ولا حته من فيلم ولاهي خيال مؤلف دى كارثة حقيقية..طيب عادى ما كل حته فيها حرامية واي حاجة معرضة للسرقة انما يبقي مفيش كاميرا مراقبة في المكان اهى دى بقا قلة الادب ليه مفيش احتياطات امنية مش ده *اهمال* مش دا تقصير ياسيادة الوزير...يا ناس ياهوو تراث الفراعنة عندنا بيتسرق ورثنا احنا بقا مش بتاع حد اهو مش عارفين نحافظ عليه هنحافظ علي لوحة الغريب دى ازاى.. هل احنا غير اهل للحفاظ علي الثروة الثقافية؟ ونبي مش مكسوفين من منظركم ادام العالم....طيب لو رجعنا وقولنا ماهو كل بلد فيها حرامية وكل حد معرض للسرقة طيب والاجراءات الوقائية... وكل اللي فات ده كوم واللي يوجع قلبك اهو خد عندك يامعلم لوحة زهرة الخشخاش اتسرقت سنة 1978 ورجعت بعدها بفترة قليلة جدا بطريقة كلها غموض عن طريق لص اسمه حسن العسال وطبعا باين كده ان السرقة تمت بغرض النسخ والتبديل يعنى اللوحة اللي اتسرقت اليومين دول اصلا مزيفة اما الحقيقية اتباعت في مزاد في لندن ب 43 مليون دولار وده اللي قاله الكاتب الراحل يوسف ادريس سنة 1988 في جريدة الاهرام... عامة لانى دايما متفائل وببص دايما لنص الكوباية التحتانى انا مبسوط ان ده حصل اه والله في قمة سعادتى لان دي احلي دعاية لوجود لوحة زى دى في مصر او احلي دعاية لحاجة كانت موجودة عندنا وتششش اتبخرت اراهن ان اكتر من نص شعبك يامصر معرفش ان عندنا لوحة بالقيمة دى الا اما اتنشر خبر اختفائها يبقي مفرحش لية؟
