جوزى اتجوز على? اربعه وانا اللى فيهم حلوه مشخلعه وبقيت اعمل كده وبقيت اعمل كده !!! ويختلف شكل الكده بأختلاف الحاله المزاجيه يعنى ينفع يكون مره شد شعرها ومره لطم على وشها ومره تقوم ترقص ، حقيقى صدق اللى قال جوز الاتنين يا فاجر يا قادر. فما بالك اللى عنده أكتر من واحده ؟! ده غير هم العيال دول بمليون جوازه، وياسلام لو العيال فى ايدين أم راضعه من امها هتطلع العفاريت الزرق والخضر على جتت الراجل واللى على ذمته كلهم ، وياسلام لو كان من عينه اللى معانا ، إنسى إنك تاخدى معاه حق ولا باطل. أم العيال الشتيمه منها شعر والذل منها كبرياء والخازوق منها ترياق و ربنا تقولى عامى بصره وبصيرته الكل يقول نيله وهو يقول جميله ، لما قهرنا. طيب معلش إهدى وصلِ على النبى وخليهم يولعوا مع بعض ، ماهو لو بيولع لوحده ويطفى ناره بعيد عنى كنا سكتنا وقولنا إهى زى خناقه الشارع وخلاص لكن كل مصيبه حداهم تيجى لغايه بيتى وتتسند ونعيش بوش مبوز وهم ما يتلم ياختى بناقصها طقه على هديه ، واللى زاد وغطى الراجل ظهرت عليه اعراض الستين وعامل نفسه نغنوغ مره قميص مشجر ومره منقط وفاكر انه لما يلبس زى عياله انه بيصغر يا راجل عيب ،مره يصبغ اسود ومره بنى ومره مصفر لما جننى ارسى على بر يا ابو العيال انت مصرى يا خو يا ولا خواجه يا حبيبى السن مش لبس وهيئه شباب لا ده صحه و قلب و حميه وانت لاده ولاده ولا دوكوهم ؟! والاكاده بيتشخلع على المخفى اللى عامل زى الشارع المفتوح وكل زغلوله لازم ينوبه منها جانب. والظاهر واحده قالت له شكلك كبير ياحاج فقال يثبت انه نونوس كمونوس نزل صوره ياختى تقولى طبق بنور صحه و وحلاوه ناوى ايه على ايه ياحاج ؟ مش لما توفى اللى معاك حقوقهم وبعدين تلتفت على ملك اليمين ؟! يا شيخه اتقى الله ده انتى جوزك ايده فرطه ولا فى زيه فالصرف ؟ حد جاب سيره الفلوس ! يغور القرش اللى من غير حنان وهيام ؟! مين حنان وهيام دول ؟ ستات عرفهم ولا ناوى يتجوزهم ؟! لا ياختى دول اللى ناقصين عشيتنا ،وفاكر ان رصيد البنك يعوضهم معلش برضه ضل راجل ولا ضل لا حيطه ! هو مثل الزفت ده اللى ودانا فى داهيه يتحسب يا ختى على راجل ليه ؟ ولا الحيطه لو مسندتش ولا إدت حنيه ومراعيه اسمها حيطه البعيده لا بتفهم ولا بتحس. لكن لما يبقى راجل ملو هدومه وبيتغندر وبيتعايق ولا شايفين منه لا سند ولا ضل يبقى على راى الست الهجر اهون من عذابى فى حبك ولا شفش يوم اندم عليه ولا جنبك ؟ وده ياختى مش يوم دول أيام تقولى مفيش غيرى يلم وراه نكد الكل كل خبطه تخبط فى راسه ولا قلبه تخبط فى? ما انا اللى بشيل وعلى راى المثل ناس لها الدح وناس لها الكخ وفى الاخر الخير والاحترامات والحسابات مش لينا ، وناويه تعملى ايه فى الليله الغبره دى ؟ هعمل ايه شوربه عدس وطاجن مصقعه بس تفتكرى اعمل جنبهم كفته ولا فراخ ؟! بصيت لها وانا مذهوله مصقعه وعدس ايه انتى فى اللالاند ولا ايه ؟ صدعتى دماغى بالراجل ومراته وعياله وبعدين اسألك عالوضع وهتعملى ايه تقولى مصقعه انا شايفه فى الوضع المنيل ده إن الكوسه هتبقى احسن ؟ إنتى بقيتى زى جوزك لا بتحلى ولا تربطى وسايبه الدنيا تضرب تقلب اللى يتشكى يتشكى واللى طلعان عينه و اللى وجوده زى عدمه وكل يوم تصدعى دماغنا. عمل ومعملش احنا خلاص طقينا منك ومنه وهو ياختى على قلبه مراوح سايب الجمل بما حمل ، ولقيتها بتهز راسها زى بتوع مجلس الشعب اللى دخلوا فيه غلطه ، وببرود هو انا عشان اتفكيت معاكى بكلمتين هتذلينى ولا هتقومى الدنيا فى دماغى. يعنى اسيبه ويبقى وحيد فريد لا حد يخبط ولا حد يسأل وإن وقع محدش يسمى عليه ؟! دى العشره متهونش الا ،،،،،،،، بقولك بلا عشره بلا عشرين هى هانت عليه ومش من دلوقتى لا من سنين بس انتى اللى معميه و عيوبه 'عنك مدارديه ، ارمى ورا ضهرك لا هيدور عليكى ولا هيتوجع ويتلهى فى عياله وام عياله دول زى بعض ولايقين على بعض اطلعى من الليله السوده دى ، واوعى اسمعك تقولى حب وغرام. ده ارف وانتقام ،،،وعشان الهبل يكمل جبت لها قرع تعملهم حلو جنب العدس والمصقعه حقيقى الجواز بطيخه ناس لها الح?مار وناس لها القشر وناس تلم البذر وعجبى !!!!