بقلم علاء الغندور س: انا مش عارف مراتى راحت فين بالليل و سألت عليها فى المستشفيات و الأقسام و فى الآخر عرفت انها كانت بايته على رصيف مجلس الشعب عشان تحجز كرسى جوه المجلس الموقر وتحضر الجلسه عشان تتصور و تطلع فى التليفزيون و تغيظ ام ابراهيم اللى كانت بتافسها فى الانتخابات...نسيت اقول لكم اتنها بقت عضوه فى مجلس الشعب و نجحت فى الأنتخابات ص: امتحانات ايه بس..ده الواد احمد ابنى اللى فى رابعة ابتدائى لسه ما استلموش كتاب و هيمتنحنوا الاسبوع اللى جاى و مش عارف هيمتحنوا فى ايه من غير كتاب. ع :كباب ايه بس يا..انا بأقول لك ان واحد سعودى اتجوز مديرة مدرسه والمديره جوزته المساعده بتاعها عليها والمساعده دى كمان جوزته معلمه فى المدرسه والراجل سعيد و متهنى مع زوجاته التلاته و احنا هنا لو الراجل فينا فكر بس يبص لواحده تانيه ما تنكدشى عليه ..يلاقى مراته قطعته و عبته فى الأكياس البلاستيك. ل:استك ايه يا عم انت بس..الحكايه ان اتحاد الكوره لما مالقاش حل للفرق اللى بتجيب حكام اجانب قام حط حكم رايه مصرى عشان يحسب للأهلى جون وهوه تسلل من على 40متر و الأعمى يشوفه و اللى يغيظ ان التليفزيون مارضاش يعيد الجون الاوفسايد . ك:عايد ايه و زايد ايه..انا بتكلم على الزمالك اللى بيشحتوا عليه و موقفين الناس فى الشوارع وماسكين ميكروفونات و ينادوا تبرعوا للزمالك لشراء لاعبين ياخدوا بيهم الدورى. م: مغاورى مين يا عم..ده صاحب الكباريه و المطرب قتلوا الزبون لما مارضاش يدفع الفاتوره اللى ب 5 أضعاف تمنها الحقيقى و لما الزبون اعترض جابوا كرشه ..انا خلاص مش رايح تانى كباريهات لأحسن يقتلونى. و:ياخدونى فين..ده ظابط الشرطه ضرب الأستاذه فى جامعة الزقازيق و لسه عندها أمل انها تاخد حقها بالقانون...و سلملى على آلة القانون الموسيقيه ن: كمون ايه..و بتاع ايه..دى غاده عبد الرازق الممثلة القشطه ناويه تكشف عن عمرها الحقيقى..انا شايف انها زغلوله ما تزيدشى عن 25 سنه..يا سلام لو ترضى تتجوزنى زكا عن صحتها لمدة شهر. و:سهر ايه و هباب ايه..انت شفت مدحت شلبى و هوه على الهوا فى قناة مودرن سبورت و هوه بيقول نكته جنسية فليلة الأدب وكل الناس تسمعها..بصراحه هوه يستاهل الضرب بالشبشب و لازم يتسجن و يدفع مليون جنيه غرامه. ى:كرامة ايه ياخويا..دول اخيرا قبضوا على 4 مسئولين فى الحى فى اسكندريه بعد انهيار مصنع محرم بك فى اسكندريه و مات اكتر من 15 مواطن و لا دفعوا لهم تعويض و لا راعوا مشاعر اهلهم و المرتشين اللى فى الحى زى ما همه..و لو كان واحد فى اللى ماتوا امريكى كانت الدنيا قامت و لاقعدتشى..آه يا بلد ما بتخافشى الا من الخواجات