انتهت المعركة البرلمانية وانتهى العنف والتحيز بل والقتل والتعصب انتهت اشياء كثيرة لم يتبقي شيء الا العالم الخسرانين اللي بيبكوا علي اللبن المسكوب والجماعة الفرحانين اللي سكبوا اللبن سميت معركة لما تحمله تلك العملية من انقسامات للشعب في كل مركز وقرية فكل فئة تلتف حول مرشحها ضد الاخرين ومنهم من يدافع حتى الموت عن ذلك دون ان يفكر للحظة "هو النائب بطوله هيقدر يعمل ايه..." كل اما كنت اشوف لافتات او مؤتمرات كانت بتصاحبنى حالة ضحك هيستيرى ولانى من البنى ادميين اللي بيحاولو يفهموا وصلت لنتيجة واحدة من اتنين لاما انا مجنون والناس دى كلها عاقلة لاما الناس معتش فاهمة حاجة وانا بقا ابو العريف دور النائب في المجلس محدود جدا ومنحصر في محطة المياة وتضبيط المجارى وتنظيف الشوارع اما القرارت الكبري تحددها الحكومة وتأخذ عليها موافقة معينيها من المجلس وكأن الشعب اراد! وبالمناسبة الجميلة دى كلمة نائب جاية من الانابة في انه ينوب عن الشعب في دايرته طارحا مشاكلهم سواء كان نائب حزبي او مستقل وطنى او معارض الفارق الوحيد بين الوطنى والمعارض ان نائب الوطنى يمتاز بالهدوء بل والبرود تحس من منظره ان لاما مفيش مشاكل في دايرته او مفيش ناس اصلا في دايرته! اما المعارض طول الوقت معترض وطول الوقت متعصب جدا ونتيجة عمل الوطنى والمعارض بعد خمس سنين هي واحدة ده لو عاش المعارض الخمس سنين لان امراض القلب والذبحة الصدرية لا تلاحق الا اصحاب الدم المحروق! ولان الرياضيات هي اللغة الكونية الوحيدة المتعارف عليها بين كل مخلوقات الكواكب والمجرات من جانب وساكنى الارض من الجانب الاخر هنحسبها لمجلسنا الموقر كالمعادلات الهندسية مما سبق يتضح لنا ان المعطيات... نائب..ومعارض..وقبة المجلس..وشعب.. المطلوب تصليح المجاري..تضبيط محطة المياة...تنظيف الشوارع البرهان بما ان الشعب بعد معركة انتخابية دامية اختار نائب ! وبما اننا نمتلك قبه! فالنائب اكيد هيقعد تحتها! وبما انه هيقعد تحتها اذن هيطلب مطالب شعبه من غير مايرفع ايديه لانها هتبقي مرفوعة طول الخمس سنين لزوم الموافقات! ولان مطالب شعبه هي مجاري ...مياه...تنظيف شوارع! وبما انا العامل المشترك في هذه المطالب ان الشعب اجتمع عليها وان الصرصار هو المتسبب في تلك المطالب! فما المانع من ترشيح نفس الصرصار كنائب عن الشعب وبنجاح تلك التجربة في دائرة ستطبق في كل الدوائر لما فيها من خير وصلاح يبقي كل المطالب اتضبططت لوحدها لوصول اساطيل الصراصير الي المجلس وعندها ستترك الحكومة المجلس للشعب لاستحالة العشرة. الا اذا تم ضمهم للوطنى..! وهذا المطلوب اثباته!