في جمهورية طراطيش ع الخريطة ناس عادية وناس عجيبة اوقات كتير بتكون حويطة لكن ابدا مش عبيطة جمهورية طراطيش ناس هنعاشرها ونجيب اخرها وحاطه مناخيرها في كل حاجة ناس محتاجة وناس ولاحاجة وناس عالية ومعاها كل حاجة جمهورية طراطيش يحدها من الشرق عدو كبير واخواتها حواليها كتير وفيها الخير والغير يتمنى تكون طراطيش فشافيش مكانها متوسط وع البحر بصت تاريخها ممدود معدى الحدود من ايام الجدود سلاطين وملوك رؤساء وسكووووت عشان داخلين طراطيش بهدوء... المكان وسط العاصمة زحام مالي الحارات ومشكلة طريق مقفول وعساكر بتقول موكب زعيمنا هيعدى من هنا ومذيعة مدردحة هتروح المشرحة من طول لسانها اللي شبه المطرحة واقفة وشاقة كل الزحام موكب زعيم واتوبيس مستنى ينتهي الكلام.... انا شاهى حريقة مذيعة في الحقيقة وجاية اغطى سبب الزحام وناخد كلمتين من ناس والسلام ونرحب بزعيمنا الحاج مستمر انا الزعيم هنا في طراطيش كلمة منى تروح الجيش واشارة من صباعى لطابور العيش يبقي رايق وكانه مفيش انا الزعيم اللي موقف الشوارع وكل اللي واقف ليا انا طايع ليا هيبة وتاريخى شيلة وفاهم ودارس احوال الزكيبة مليش مستشار ولانايب ولا عار انا فاهم اوى وعامل استقرار... مأمن موكبي براجل حبنى من ولاءه ليا يقول يامعلمى .... كمين امين .. ..مسدسات ومحاضر واشتباه وعساكر وتأمين مداخل وكله في عصمتى...بتابع الموكب ولا حدش يركب غير بأمر معلمى.....اسيبكم مع الكوارشي . ..احم احم ايوة انا الكوارشي وسيجاري لعند كرشي وفلوس ماتحسبشي مصانع وشركات وكله يقولي هات ضرايب وفيلات وفي المجلس من البهاوات يعملولي الف حساب .... ونرجع تانى لشاهى....حاسة انى ف ملاهي ريحة البرفانات والناس اباهات ولمعة نظارات والعكس بالتمام في الناس المستنين...اتوبيس كبير شايل جواه كتير واقف مستنى يعدى الزعيم.... انا عبده فتيس سواق الاتوبيس الحر اكل دماغي وداخل في التهييس هو احنا ياستى معيييز؟ بصي للاتوبيس علبة تونة ناس مهروسين وناس ملعونة انا مغصوب افندى... .موظف حكومة يعنى ملقتش حاجة تانية فيها الدنيا بمبى مرتبي ملاليم نايم ع الكليم ماشي في السليم وحلمى علي اد علمى.... وانا بهية طالبة جامعية اتحادات شرعية واتحادات ظلية مظاهرات طويلة في كل الكلية اقول حاضر ونعم واحرق العلم واكتب شعارات وحياتى تحريات وصوتى مابيندفن ... انا الاستاذ موسعها.. .احب ابان بسيط عشان النفسيات بركب اتوبيس عشان اكون حسيس ومحدش يقول عليا مش براعي الغلبانين عندى ملايين وبتوسط في التعيين لولاد حتتى...حتى عند الهرم السياح تحبنى فلاشات كاميراتهم لابد تضمنى صيفى كله في شرم ومتعدش كام خرم في جزمة حضرتى...ما اقولت انا حسيس وانا بقا ملقاط مبقولش لحد هات بقلب عيش جنابي من جيوب البهوات مبحبش الفرعنة ومؤمن بالجري نص الجدعنة... انا كئيب كأبة دا اسمى فيه حاجة؟؟؟ الدنيا سودة جدا والامل كدبة كبيرة عايش معرفش ليه والدنيا بيا فايتة وزي ما قال مولانا والنعمة مافي فايدة هىهىهىهى انا سعيد ابتسامة تندهنى اجيلك حمامة الدنيا والله ضحكة والفرص كتيرة ياما واشجب انا وادين كل البنى ادمين انا معترض كل الصح غلط وحتى الغلط غلط ولغاية ما اموت ياعمى هكون انا معترض ... سمحوهااااا حابس حابس حابس حىىىىىى انا دهشورى الدجال اعرف من غير ماتقولى داير في نفسك ايه الجن دول حبايبي ارمى الودع يابنتى وثوانى انا جىىى انىى صميدة الفلاح حياتى كلها كفاح وضميرى دوغري مرتاح مربي جموستين وحمار وبغلتين وعندى غيط كبير واول مايطل الليل ننعس نستنى صباح ولا عندى جاه ولا عزوة واتمنى اشتري معزة واسميها صباح انا نبغة فيزيائي عبقري ولافكاري انا صاين خليفة اينشتاين ومحبش الغبي كل شيء ممكن بالعلم والتفكير انا عامل بحث علمى كبير وغيره خطير يعنى قادر ع التطوير ومتمرد للتغيير ولا عمري اقدر اروق لان مكانى فوووق وبكره هتسمعى... بيوتفل يامززة انا فاكس صغير بس مشاكس كل البنات تتعاكس وعندى افيهات بحب المطربين والرقصات والطبالين مثلي الاعلي تيمو وشعر صدري كتير مليش في السياسة بحب المصاصة وتسقيط البنطلون لون شعري جامد اهم حاجة عندى نزل كام البوم؟ ولابي سعره كام وموبايلي برضه كام وتوكه الحزام يلا كفاية لوك لوك هتلاقينى ع الفيس بوك صفحتى لوفيرز فاكس اممواه اي لوف يو.. يا اه يا اه..انا المعلم فتله كبير حارتنا قهوتى لمة الناس علي اول ناصيتنا ليا شنة ورنة وشنبى كبير يا اخوانا طول اليوم اشخط وانطر ومتمكن من حتتنا انا بوعلي النقاش الناس عايشة طشاش والحل في الاساس نتمسك بالدين ونسيس الاتنين وبعد سنين ياستى اكون انا سيد الناس بفره الملفوف... مزاجنجى علي كيفك شادد نفسين سيبك من الناس المسطولين انا بس اللي فايق واحسن من اللي سايق و في جيبي تذكرتين ما تيجى ناخد جنب ونعمل تعمرتين بفهم في الصنف جدا وبحب البياعين... ها ها ها ها انا الست عين والناس تخاف من العين ومن غير أر يا ختى مشغلة الاتنين اعععع... وبعد ماقابلنا الناس وعدى الزعيم خلاص استنونى بكرا في حكاية توجع الراس .... كانت معاكم شاهى حريقة من امام موكب الزعيم والناس المستنين....
