دشنت حركة 6 أبريل مبا درة تحت عنوان:" هنعيد على أهالى شهدائنا " وقامت بتوزيع منشور يحتوى عبارات تحث على تهنئة أهالى الشهداء ، مع أسماء وأرقام هواتف عدد من الأسر بهدف خلق حالة من التواصل معهم والاعتراف بفضل هؤلاء الشهداء فى نجاح الثورة المصرية . وجاء فى المنشور الذى قامت الحركة بتوزيعه ....عيد الفطر .. جه علينا .. أول عيد بعد الثورة و كل سنة وأنتم طيبون لكن و إحنا بنعيد .. لازم نفتكر كويس قوي .. شهداء مصر .. شهداء الثورة يا ترى كام أم مش هتلاقي ابنها فى وقت العيد تصحيه لصلاة العيد؟ يا ترى كام أخ مش هيلاقي أخوه يهنيه بالعيد؟ و كام طفل و كام زوجة اتحرموا - بسبب مبارك و مجرميه - من أب شهيد .. كان هيدخل عليهم الفرحة فى يوم العيد ؟أقل حاجة مطلوبة منك هي كلمة حلوة ... حاجة خير ومساهمة منك تدعمهم احنا هنتصل بيهم .. هنبعت لهم رسائل SMS هنكلمهم، اتصل برقم او ابعتلهم ،قلهم كل سنة وانتم طيبين قلهم و اسألهم اذا كانوا محتاجين اي حاجة ؟ قلهم و اطلب منهم يدعولنا .. و قلهم قد ايه اننا جنبهم فى أي شيء يطلبوه قلهم إن حق اولادهم مش هنسيبوا .. قلهم إن دم الشهداء عمره ما يضيع هدر و إن اللي مات علشانه الشهداء ... مصر حرة كريمة .. هيتحقق قريب بإذن الله مهما حصل.