نعيش أجواء كدبة أبريل على طريقة «الكدب مفتاح الفرج.. والصدق نجاة من غول الأسعار»!! رئيس حكومتنا إبراهيم محلب وعدنا بإجراء الانتخابات البرلمانية قبل «رمضان» القادم.. اللهم قرب البرلمان البعييييد!! بعد أزمة الأسمدة.. الفلاحون يستغيثون بالوزير الأخضر صلاح هلال: «يا وزيرنا ارحمنا.. الأرض عايزينها تبقى خضراااا»!! عودة الإعلامى معتز الدمرداش فى برنامج «أخطر رجل فى العالم».. لا طال تين الكوميديا.. ولا بلح التراجيديا!! بمناسبة كدبة أبريل.. الشعب بيكدب على الحكومة.. وماما الحكومة بتصدق الشعب.. وبترحب ب «بابا غنوج»!! الإعلامي الساخر باسم يوسف بعد إجرائه عملية الغضروف فى ركبته مازحاً: «الكفتة لا تزال فى ركبى».. وطبعاً أنا ركبى حديد!! المناظرة الفكرية بين الأزهر والإعلامى إسلام بحيرى دخلت «نفق الأزهر» من جهة صلاح سالم!! إلى وزير الثقافة عبدالواحد النبوى: على رأى الفنانة الراحلة صباح: «ما بخدش منك غير كلام!!! على رأى الإعلامى المخضرم عمرو الليثى: المحافظين قاعدين يلفوا ع الفضائيات ويقولوا: «هنعمل وهنسوىّ».. يااا رب ميكونش شغلهم ضجيج بلا طحين بالعسل الأسود!! الزعيم الفلسطيني ياسر عرفات قال مقولته الشهيرة: «يا جبل ما يهزك ريح».. والشعب المصرى بنقوله: «يا بطل ما يهزك فرقعات الإخوان»! الفنان عادل إمام سدد ضرائب 5.4 مليون جنيه عن العام الحالى.. ودى أول كدبة وآخر جباية من صاحب السعادة!! فى عهد مبارك المخلوع صنعنا أول «أستيكة» وفى عهد «مرسى» المعزول لطشنا ب «قلم الأخونة» وانضربنا من إخوانه البعُدا ب «المولوتوف»!! بمناسبة محافظ الإسكندرية الأمريكاني.. نُهدى أغنية المطربة جواهر: «أنا لو جابولى الأمريكانى والإنجليزى والياباني.. أنا أقوله لأ لألأ»؟! فى هذه الأيام الرمادية.. محدش مننا فاهم حاجة.. واللى بيفهم بيموت من الضحك وبيعيط من الواقع!! لو أقسمت الست «نزيهة» على نزاهة مسابقة المدرسين لأعطيتها «صفر من عشرة» ومنحت وزير الكراسة والكشكول وسام «أحلى كدبة»!! وزيرة السكان هالة يوسف قالت ل«ستات مصر: «ارحمونا شوية من الإنجاب».. وطبعاً الستات يحتفلن كل 30 ثانية بسبوع «حسنين ومحمدين»!! على رأى الإعلامى أسامة كمال عن أحوال المصريين: خلى أعصابك فى التلاجة جنب البابا غنوج.. وطبعاً خلى «الصياح» صاحي!! «النمارسة» يتفاخرون: إحنا اللى ضحكنا على العفريت.. والألمعية ريهام سعيد ترد: إحنا اللى صرفناه.. أشتاتا أشتوت!! المصرى بيفهمها وهيّ طايرة.. ولما تقع منه يندم ويصرخ: دى كانت فى إيدى يا ألف خسارة ع الكلامنجية!! بعد الثورة.. إحنا اللى دهنا الهوا دوكو.. وشربنا الجاز من الحنفية.. وأكلنا اللحمة نية.. وحلينا بحلة ملوخية.. يا ميت خسارة ع الأيام الجاية!! آخر شوكشة من لغة أونطجية هذا الزمان: إحنا اللى خرمنا الأوزون.. ولبسنا الشمس بنطلون.. ونزلنا القمر ينوّر الدنيا والكون.. وعجبى!! Elzaky2020 @ gmail. Com