لو كان المخفى محمد مرسي مازال يحكم مصر هو وأهله وعشيرته، كان زمان مصر وصلت كأس العالم وما كانش منتخبنا الموكوس اتهزم يا رجالة فى كوماسي وفضحنا وكان زمان المخفى جاب شوية المقاطيع بتوعه ودعوا على المنتخب الغانى أنه تتشل رجليهم وتنكسر رقابيهم وعملوا لهم عمل أنهم يعموا ما يشوفوش مرمى شريف إكرامى أبدا وفى نفس الوقت يدعوا للمكسحين بتوعنا ويعملوا لهم عمل يخلوهم مرسي استايل يفتحوا صدرهم ويخشوا على الجون الغانى اللى معندوش فكرة أصلاً. صدق أو لا تصدق هو ده بالضبط اللى الإخوان الشمتانين بيقولوه بشماتة غريبة جدا وبغباء لا مثيل له وبخسة وندالة أصيلة فى أخلاقهم وبعدم انتماء وولاء لهذا الوطن اللى ياما اتحمل منهم سفالة وإرهاب وقلة أدب وجهل وتخلف ومؤامرات على أمنه وسلامة أراضيه. والحقيقة أنهم يثبتون مجددا غباء غير محدود وبهذه الشماتة فى مصر بيكرهوا الناس فيهم أكثر وأكثر ويبدو أن هؤلاء الإخوان المفلسين مرضى لا عقل لهم ونفوسهم مريضة ومعطوبة فكيف تشمت فى بلدك وتدعو على ناسك يا واكل ناسك أنت وهو. ومرسي مين ده اللى كان حيودينا كاس العالم وإيه الخيبة القوية اللى أنتم فيها دى إزاى يا أغبياء تربطوا عيشة بام الخير وطوخ فى مليج إيه علاقة مرسي بهزيمة فى الكورة ياما منتخبات وفرق قوية جدا اتغلبت هى دى الكورة وبعدين المنتخب عنده أعذار كتير أولها توقف النشاط الرياضى ولا فى دورى ولا كأس وأنتم وإرهابكم السبب وبعدين الكابتن برادلى الأمريكى زى ما يكون متفق معاكم واقف طول الماتش يكلم نفسه وكأنه عامل عمل للعيبة علشان يتوهوا فى الملعب ولا شوفنا منه اى خطة ولا دياولو ولا كأنه يعرف أى حاجة عن كورة القدم ولا كأنه سمع عن غانا ولا شاف اللعيبة دول قبل كده سايب الدنيا تضرب تقلب وواقف يتفرج ويتمتم بكلام غير مسموع وغير مفهوم وكأنه بيقول لكم أنا معاكم شمتان فى مصر وأنا ماليش دعوة أنا أقبض بالدولار وبس زيكم. طيب حد فاكر أى إنجاز للأخ المخفى مرسي وعشيرته فى أى مجال طيب أدونا أمارة هل فى نكسة ووكسة حطت على مصر أفظع من مرسي وعشيرته اللى خلوا طعم الحياة علقم وتوقف كل معنى حلو فى مصر ولا بقى في فنون ولا فى رياضة وتحول استاد القاهرة إلى خرابة يلم فيها المخفى عشيرته الإرهابيين ويركب عربية مكشوفة ويلف التراك يحييهم ويحيوه ويبوسوا إيديه ويكشفوا رأسهم ويدعوا على شعب مصر كله وقال إيه هى دى احتفالات اكتوبر يا ناس اختشوا وانكسفوا على دمكم ده لو كان عندكم دم أساسا خليتم صورة مصر مسخرة أمام الدنيا كلها إيه الهبل اللى أنتم فيه ده وإيه علامة الصوابع الأربعة العبيطة اللى فرضها عليكم سيدكم أردوجان والتنظيم الدولى الراعى الرسمى للإرهاب أنتم ناويين على إيه مفيش حاجة عندكم لها احترامها أبدا لا علم مصر ولا السلام الوطنى ولا جيش ولا شعب ولا أرض ولا حدود ولا حتى المنتخب عموما أنا عاوز أفكركم بكلام ينكد عليكم مصر أم الدنيا وحتبقى أد الدنيا. أفكار للتأمل لو نزل مسلم وكافر إلى البحر فلن ينجو إلا من تعلم العوم فالله لا يحابى المسلم الجاهل. دكتور مصطفى محمود