عرض الدكتور محمد رفاعي ، رئيس لجنة ذوي الإعاقة بالمنظمة الدولية لحقوق الإنسان ومكافحة الفساد ، 30 طريقة عملية لابعاد اولادك عن الموبيل والتاب. قال "رفاعي" التليفزيون و التاب و الموبيل و الكمبيوتر كلها حاجات ليها وقت محدد مسموح بيها كل لا تتضر، الطفل الوقت المسموح هو ساعتين في الأسبوع ومن بعد 8 سنين ممكن ساعة في اليوم. ونصح "رفاعي" كل أم تخطت الوقت ده بمراحل ووألادها بيقضوا ساعات من يومهم امام الكرتون بغض النظر هو كويس ام لا ، حتي لو بيشاهد قناه تعليمية للأطفال . وشدد "رفاعي" علي ضرورة تطبيق هذا علي علي قناة "براعم" التي غضبت منها امهات كثيرة مضايقة لأنها اصبحت بأشتراك ، و أطفال كثير متأثرة نفسيا ، كأنها حاجة مهمة أوي في حياتهم اختفت مش مجرد قناه !! واكد "رفاعي" علي كل أم في حالة تجاوز الوقت المسموح به، كان هذا المحتوي سبب كافي ان طفلك سلوكه يسوء و تركيزه يقل علي جميع المستوايات. واجاب "رفاعي" علي التساؤلات التي تطرح في ذهن كل أم، بأن الطفل يشعر بالملل ،نلعب معه ايه ، وعندما اكون مشغولة ايه اللي ممكن اشغله فيه ؟ طرح "رفاعي" افكار تساعد الام علي اشغال وقت طفلها ، مع ضرورة ان يناسب سن و شخصية طفلك ، و ممكن تأخدي الفكرة تطوريها او تبسطيها حسب سنه ، وهم : 1-مشاركة في تنظيف أو ترتيب البيت 2_ سرد حدوتة . 3-اعملوا مسرح عرايس و خليهم هما يعملولك القصة و انت اتفرجي . 4-الواح ورق كبيرة عالحيطة و يرسموا بخامات مختلفة الوان خشب,فرشة و الوان مياه,الوان اصابع ,لوح سودا و يرسموا بالطباشير مش كراسة رسم و علبة الوان , و ممنوع كراريس التلوين التي فيها رسومات جاهزة مطبوعة و هو يلون لأنها من معوقات الإبداع. 5-العاب مطبوعة يحلوها زي الاختلافات و المتاهة و انهم يدوروا علي حاجات في مشهد. 6-تتفرجوا علي فيلم قصير او كرتون عن قيمه معينه و تتناقشوا فيها . 7-تتفرجوا علي اي مشهد من فيديو و بعدين تسألوا بعض فيه مثلا كانوا في مكان شكله ايه ؟لبسهم؟عددهم؟ 8-بازل فيه من اول ال 4 قطع لحد ال 300 قطعة و اكتر 9-اي مكعبات مبتتجابش و نرميها للطفل و خلاص و بعدين نقول محبهاش لأ لازم نطور فيها مره نعملها عربية و نركب فيها لعبة تانية مره نعمل بيت علشان نمثل بيه حاجة تانية ,مره نعمل حيطة صغيرة علشان نداري ايدنا وراها في مسرح العرايس اتفقوا علي فكرة و سيبيه ينطلق فيها . 10-تقليد اصوات كل واحد يقلد صوت حيوان او حاجة و الباقي يخمنوا . 11- عروستي :دي ممكن تلعبيها مع ولادك و انت في المطبخ يقعدوا عالباب و تلعبوا اي حاجة موجودة في الشقة حد يوصفها و الباقي يخمنوا مثلا عروستي ؟ حاجة حمرا ,عروستي ؟ بتتاكل ,عروستي؟ بتتقطع عالسلطة (طماطم) 12- بدل ما نتعلم الحروف و الارقام عالورق نجيب طبق مليان رمل او ملح و الطفل يكتب بصباعه بعدين تلخبطوه و تكتبوا غيره و ممكن لوحده يعقد يرسم بنفس الطريقة 13-فصل الحاجات : مكرونة و عدس و طبقين و الطفل يفصل كل حاجة في طبق ممكن لو سنه صغير نخليه يفصل حاجات اكبر و اسهل و ممكن نطبق نفس اللعبة في فصل الالوان يعني يفصل كل الاحمر لوحدة و الابيض لوحد و ممكن نلعبها في سبت الغسيل يفصل لبس ماما عن بابا عن لبسه يعني كل لعبه مرنة و تنفع لأي سن 14-نعمل صلصال منزلي (كوب دقيق+نص كوب ملح+معلقة زيت+الوان طعام ) و نعجنها بمايه لحد ما تظبط و نخلي الطفل يعجنها بنفسه ,ممكن تقعد لأسبوع في التلاجة في كيس 15-أي حاجة يدوية شوية خامات الطفل يطلع منها حاجة . 16-سينما : تضلموا الغرفة و تعملوا فشار و عصير و يبقي حد مهمته يحط الفشار في اكياس و حد يوزع تيكت و حد يظبط المكان و تتفرجوا علي اي فيديو حتي لو ربع ساعة ممكن مره عن الحيوانات مره طيور مره اسماك بلاش مش لازم كرتون 17-مخييم في الصالة مره في الاسبوع في الشهر اي كان المناسب تطلعوا مرتبة بره و تناموا كلكوا جمب بعض ده مفيد جدا للأطفال اللي لسه بتتعلم تنام لوحده بيبقي حافز حلو ليهم اننا كل فترة هنام كلنا سوا شرطها تكون بره مش في غرفة الاب و الام علشان الطفل ميرتبطش بالغرفة و يروحلها كل يوم 18-خيمة : كرسيين و فوقهم كوفرته او اي خيمة بشكل بسيط الطفل يتعلم يعملها و يقعد فيها يلعب اللي يحبه ,بيفرحوا بيها جدا . 19-تمثيل : حد يمثل تعبير بالوجه و التاني يقول معناه (زعلان-فرحان) ممكن حد يمثل وظيفة ... 20- لعبة المطعم نعمل في يوم منيو و حد يبقي طباخ و حد جرسون و كده او اوبن بوفيه و نتعلم من خلالها اداب الطعام بشكل مبسط 21-هيحصل ايه ؟ نطرح سؤال افتراضي و كل واحد يجاوب زي هيحصل ايه لو السماء مطرت رز بلبن ؟ ممكن نبسط السؤال ,هيحصل ايه لو صحينا لقينا في البيت قطة ؟ ... طبعا لو ابنك بيترعب من القطط ده مش سؤال مناسب 22-سوق الخضار و الفاكهة :الأم تعمل بياعة في السوق و الأطفال يشتروا و يغسلوا و ياكلوا اللي اشتروه و لازم تبقي متقنة يعني كل ما الام تتقمص اللعبة هتحلو 23-نعمل كيك او كب كيك و نحط اطباق كريمة,فواكه ,بسكوت ..و كل واحد يزوق حته (نبعد عن عجينه السكر لأن سكرها عالي و اي سكريات كتير بتهيبر الطفل) 24-الميك معاك : نجيب ميكروفون بيتباع ب 15 جنية و نركبه في السماعات و كل واحد يبقي ليه فقرة يطلع بقي يغني ,يحكي حدوتة ...فقرتك كأم ممكن تحمل رسالة غير مباشره عن اللي تحبيه. 25-كمل الحدوتة : حد يبدأ مثلا كان مره واحد ماشي و فجأة ...التاني يكمل و لو الطفل مش عارف يتخيل ممكن اسيبله النهاية بس يعني كان فيه مره ولد قلمه ضاع فخد من مصروفه و راح المكتبة .... و الطفل يكمل 26-اجتماع عائلي : مره في الاسبوع تجتمعوا و كل واحد يقول اكله ليوم في الاسبوع القادم و تعملوا منيو الاسبوع فطار غدا عشا مكتوب و متعلق ده مهم جداااا في تعليم الطفل النظام و للأطفال اللي بتصحي ماما هفطر سندوتش جبنه بعدين تعمليه يقولك لأ بيض و ينتهي الموضوع بخناق لكن مع وجود الجدول هيقولك لأ بيض هتقوليله حاضر يا حبيبي هكتبها في منيو الاسبوع القادم و بس و بتعلمهم الإيثار بمعني بابا مختار في يوم ملوخية و فراخ و سلطة و ارز جه اليوم ده و ابنك مش بيحب الملوخية بياكل سلطة و فراخ و ارز بس مش بتعمليله اكل مخصوص و ده ينطبق علي باقي الايام لو الاب مبيحبش حاجة الطفل مختارها برضه هياكل باقي الموجود و ميتعملوش مخصوص ... 27-عكس الادوار : لمدة ساعة مثلا ابنك ياخد دور الام و انت تاخدي دوره و تعكسوا المهام انت ترتبي اوضته و هو يوضب حاجة في البيت من مهامك مثلا , اللعبة دي بتبينلك ابنك شايفك ازاي و شرطها متنتقديهوش في اللعبة خالص لأن ممكن تلاقيه لما خد دورك بدأ يزعق و يحط ايده في وسطه فأكيد انت بتعملي كده 28-مكالمة : تخليه يكلم حد من الاقارب يسأل عليه 29-قولي ميزه : كل واحد يقول ايجابية في غيره بتبقي حلوة جدا و بتعرفي ابنك بيحب فيكي ايه 30-طبقين واحد فاضي و التاني في سفنجه و مياه و الطفل ياخد السفنجة يعصرها في الطبق الفاضي لحد ما ينقل كل المياة من ده لده تفتكروا لو طفل عملناله كل التجارب و الالعاب دي في شهر يعني كل يوم فكرة واحدة هيطلع زي الطفل اللي بقاله شهر معظم يومه قدام كرتون ؟؟! الدكتور محمد رفاعي ، رئيس لجنة ذوي الإعاقة بالمنظمة الدولية لحقوق الإنسان ومكافحة الفساد
