بسخرية شديدة واستهزاء قاسى, قابل الفيسبوكية خطاب الرئيس المخلوع حسنى مبارك - والذى أذيع عصر اليوم الاحد على قناة العربية – متهمين المجلس العسكرى بالتواطؤ ومتسائلين عن اسباب ظهور الرئيس السابق فى هذا التوقيت واصفين ما يحدث بالمسرحية الهزلية. وجاءت اغلب التعليقات التى شهدها الموقع الاجتماعى تصب فى نقطة واحدة ... تهريب الرئيس السابق امواله خارج البلاد وتصفية اعماله ودفن كل ما يدينه ثم الخروج للنور مرة اخرى - بحماية خارجية – والتهديد بملاحقة كل من يسىء له قضائيا . وتنوعت التعليقات بين السخرية من الخطاب والتعدى على شخص الرئيس السابق بالسب ومنها: - عودة الندل !! - تصدق بالله .. انت رئيس جمهورية مستفز !! - هناك كلمة واحدة يجب أن تقال ردا على خطاب مبارك على العربية...لن أستطيع ان أقولها على الملأ. - حسبى الله ونعم الوكيل ........... الشعب يريد إعدام الكداب. - السماح لمبارك بالظهور في الاعلام قبل محاكمته مسرحية هزلية يشارك فيها المجلس العسكري زيها زي تمثيلية الاقامة الجبرية..رجاء لا تستفزوا الثوار. - لم ننجز ثورتنا بعد و لم نتمها .. فقط بدأناها، فلا يزال المفسدون يمارسون حياتهم وجرائمهم ضد الشعب تمضي بلا عقاب و الآن بقى علينا تطهير بلدنا وندعوكم الي مشاركتنا الطريق. - خطاب غريب فى توقيت غريب ربنا يستر. - بعد ما زكريا عزمى فرم الاوراق فى قصر الرئاسة و بعد ما مبارك هرب فلوسه وسوى كل اموره طالع بكل جرأه يقولنا انه برىء ..شكرا للمجلس العسكرى. - ايييييييييه العظمة الراجل برىء و مظلوم .. و هيطارد الشعب المصري اللي افتري عليه في دار دار و زنجا زنجا علشان ياخد حقه. - عدنا لأيام انتظار خطاب مبارك وتأثيره على الاخوة الافاقين بتوع بنحبك ياريس. - خطاب موجه إلى الأطفال وربات البيوت. - مش فاهم هو هيوافق ع المكاتبات لوزارات الخارجية هو مين اساسا؟ - الرئيس مبارك طالع يتبرأ من فلوسه المدام والأولاد بعد ما ظبط اموره وهرب الاموال ......طالع يدعى الشرف بعد شوية الرجالة هتطلع تقوله احنا آسفين ياريس احنا عايزينك ترجعلنا تانى. - يعني ايه كوكا زيرو؟ يعني حسني مبارك يسرقنا و ينهبنا و هو اللي يحاكمنا و يرفع علينا قضية! - لازم المجلس العسكري يطلع بأي رد بدل ما الشعب يبهدل الدنيا وهو ده شكله اللي هيحصل بصراحة أنا عندي هيسترية ضحك. - يعني من الآخر وبالبلدي كدا انا هربت فلوسي ياشعب يا اهبل وهرفع عليكوا قضية تشهير. - ماناقص يقول نظراً للظروف التى تمر بها البلاد .. قرر المجلس الاعلى تسليم سلطات رئيس الجمهورية لى للحفاظ على الامن والاستقرار . - احنا آسفين يا ريس..بس اقسم بالله انت حرامي وحرامي كبير كمان ..ياراجل اكبر دليل علي ان معندكش دم هو بقاءك حي الي الآن فعلا اللي اختشوا ماتوا..ومش هقول غير كلمة الحاجة زكية وهي"روح يا راجل ربنا يفضحك يا مفضوح" - مبارك يريد التخلص من الشعب المصرى ..هيجيبله شلل!! وقبيل اذاعة البيان .. وبمجرد اعلان القناة عنه ... انتشر على الفيس الاعلان عن بث الخطاب مباشرة على قناة العربية, مع موجة توقعات لطبيعة البيان اهمها : - اتوقع خطابا عاطفيا لدغدغة عواطف المصريين ..بس وحياة خالتك ما هانسيبك يا مبارك. - مبارك يتحدث الى الامة بعد قليل ..والله زمان يا رمضان. - طبعا الكلمة ع العربية هتكون مستفزة والمعتصمين هياخدوا رد فعل غبي عيشوا بقي .. فلول الثورة. - بعد انقسام الجيش المصري اليوم الرئيس المصري السابق حسني مبارك يلقي حديث بعد 5 دقائق.