اختلفت نظرة الشباب لمواصفات الشاب الوسيم أو "الروش" الجذاب قبل الثورة عنه بعد الثورة، الشباب قبل الثورة كانوا يميلون الي العاطفية التي تجذب البنات حولهم ويتشبهون بالفنانين ونجوم الكورة وذلك في تسريحات شعرهم وارتدائهم ملابس مشابهة للنجوم، وكانت مواصفات الشاب الروش قبل الثورة: تسريحة شعره زي تسريحه كابتن ماجد. ضارب نضاره شمس ب10 جنيه من العتبة. لابس حظاظه ب2.5 جنيه. مستنضف عربية شيك وساند عليها لابس بنطلون جينس ديرتي مقطع فاتح القميص لحد اللوز لابس حزام بتوكه لميع جزمته متلمعة آخر حاجة وبكده يكون اخد المواصفات الكاملة للشاب الروش، بس الكلام دا كان قبل الثوره اما بعدها فالدنيا تغيرت وكل حاجة في مصر اتغيرت ليصبح الشاب الفيس بوكي هو الشاب المثالي فلم لا، ولتصبح مواصفات الجاذبية كالتالي: متصور جنب دبابة وحاطتها صوره للبروفيل بتاعه. مبتسم ورافع إديه بعلامة النصر في الصورة أو حاطة صورة علم مصر، أو رافع إصبعه وهو باللون الفوسفوري بعد الاستفتاء. وبعد ما كان اهلوا بيزعقوا له عشان قاعد علي الفيس بوك بقوا دلوقتي بيفتخروا بأنه قاعد مع نهار علي الفيس. كمان البروفيل بتاع حبيبته علي الفيس بوك ميكونش فيه صبيان خالص غيره وان لا يزيد عدد صديقاتها علي 50 صديقة. كل واحد قاعد علي الفيس بوك بيفكر يعمله حزب سياسي وكل شويه حد يعمل جروب ويقول عليه جروب لحزب 25 يناير واللي معملش جروب مشارك في جروبات تانية كتير. لا يخلوا البروفيل الخاص به من التعليقات السياسية والمناقشات الساخنة عن مستقبل مصر في الفتره القادمة. طبعا هو وصحابه كل يوم يتفاخرون فيما بينهم مين اللي نزل فيديوهات سياسية أكتر علي الفيس وكان عليها اكبر نسبة تعليقات.