هنأت "الست غالية " أمس الأحد المصريين بفوز الدكتور محمد مرسي عبر برنامجها على قناة 25 قائلة:" ألف مليون بركة للريس الجديد، وفرحتنا بإننا بقى لينا ريس متتقدرش". وكعادتها، علقت الست غالية على الحدث عبر عدد من الأمثال الشعبية، قالت:" ما حش إلا من رش، احنا شوفنا السنة اللى فاتت كتير، وجه الوقت اللى نفرح فيه والحال يمشى"، وأعربت عن مشاعرها بأنها مثل أم العروسة:" انا عاملة زى أم العروسة فاضية ومشغولة ، من الفرحة مش عارفة أطبخ ". ووجهت غالية كلمة للفريق شفيق، قالت فيها:" بقول للمصريين، تبات نار تصبح رماد ليها رب يديرها، وبقول للفريق شفيق، تكون فى ايدك وتقسم لغيرك، وكلنا مع بعض نبنيها وكلنا لينا دور، أرموا الحب والتكال على الله". وأخيرا وجهت كلمة للمصريين قالت فيها:" من بكرة، نشتغل ونحط ايدينا فى ايدين بعض، ونقف فى ضهر مصر علشان نقويها". وردا على سؤال من احدى المتصلات بالبرنامج عن أن الرئيس محمد مرسي سيلزم النساء بالجلوس فى البيت، قالت:" مش عاوزة حد يقول الريس الجديد بأى هيقعد الستات فى البيوت، الرئيس الجديد عارف مقامه وعارف ان فيه ستات متعلمين وستات بتعول اسر، كلنا هنشتغل والمصانع هتتفتح، مفيش ستات هتقعد ولا حاجة، مش عاوزة حد يقلق ولا يخاف، احنا اللى جايبين الرئيس واحنا اللى هنقوله محتاجين ايه". يذكر أن " الست غالية " أو غالية محمود هى طاهية ثلاثينية مصرية، تقيم فى حى الوراق، كانت تعمل فى الطبخ والتنظيف فى منزل محمد جوهر مالك قناة 25، الذى بدرت له فكرة تقديم غالية لبرنامج طبخ جديد يهتم بتقديم وجبات غير مكلفة، مما دعا صحفا أجنبية لتسمية غالية "مفجرة انتفاضة المطابخ من على شاشات التليفزيون فى مصر" . شاهد الفيديو