إلي عاطف عبيد اللي كان رئيس وزراء مصر علي رأي المعلم حوده مصر يا أهل البلد بالستر موعودة من قبل ما تتولد في القلب موجودة واللي بيسرقها..!! بتبقي آخرته سودة..!! إلي سيادة النائب العام المستشار عبدالمجيد محمود اللي نهبوا البلد..! ملهمش يا بيه ملة..!! واللي معاه مغرفة واللي معاه شلّة لقي المغرفة مش كفاية رماها.. ونط في الحلة..!! إلي أنس الفقي اللي كان وزير إعلام الوزير الاماره.. اللي اخر شطاره يلاقي نفسه في مغارة.. وجوه منها وزارة فيها الفلوس ملايين.. خباها في الليموزين وعبي الدهب في شكاره..!! إلي منير الوسيمي نقيب الموسيقيين الدنيا لما تولي بتجلس الأستاذ وتكسر البرواز..!! وتمسكوا عكاز ويلحن كمان ويغني.. وهو صوته نشاز إلي شباب ثورة 25 يناير مطاريد السياسة عواجيز في الخباثة بيشكلوا معارضة ويدبروا مؤامرة.. لو ركبوا في الثورة حتبقي نار حمره.. وتتقلب فوضي..!! إلي الدكتور سامي عبدالعزيز عميد كلية الإعلام كان نفسي أقول للحكام حاجة..!! مش فاكر منهم ولا حاجة..!! إلي الحزب الوطني ابحث مع الأيتام. خرج المذكور عاليه منذ أيام. وتاه في الزحام. يرتدي بيجامة حمره بدون أكمام من يجده يسلمه فورًا لسيادة النائب العام..!! إلي رئيس الوزراء دكتور أحمد شفيق الشعب اللي مش عاجبه وزارتك وعمال بيضرب فيك صواريخ..!! وأنت جاي تعمل له تاريخ سيب وزارته في كوبري القبة واعمل وزارة في كفر الشيخ..!! إلي ملكة الحوار التليفزيوني مني الشاذلي نصيحة من أحبابك عشان تريحي أعصابك وتقولي اللي نفسك فيه شوفي لك بلد تانيه فرنسا أو ألمانيا وافتحي قناة لحسابك قوليلي رأيك ايه إلي رؤساء تحرير الصحف القومية ساعة الدنيا ما تبقي هوجه وتمشي معدولة واللا معوجه فيها الناس بتقلع ضميرها وبتركب الموجه..!! إلي الفنان فاروق حسني اللي كان وزير للثقافة علي رأي ربيع عنتره.. جابوا الدفاتر تتقرا.. بعد اللي كان والفشخرة.. عرفنا كل اللي جرا الثقافة في الهيافه.. والمسارح في الكنافة وكلنا بنجيب ورا..!! إلي صديقي سعد عباس نائب رئيس صوت القاهرة بيقولك عم شحاته اللهم لا شماته وبيحلف لك بالتلاتة الجماعة في زنزانتهم..!! وأنت رايح لزيارتهم خد لهم طبقين بكاتا..!! إلي اللواء طارق مهدي رئيس اتحاد الإذاعة والتليفزيون »الجديد« يا داخل ماسبيرو بخير وناوي تعمل فيه تغيير.. بخر نفسك واقرا يس.. وابدأ فورًا في التطهير.. علشان فيه يا سعادة البيه..!! عش كبير مليان دبابير..!!