بحر السياسة غويط -------------- والموج عالي عليك لو أنت مِيت حويط -------------- هاتغرق من راسك إلى رجليك فاكرنا شعب عبيط -------------- ولعبة بين إيديك حياتنا بقت لخابيط -------------- واحنا منك واليك كفاية بقى تنطيط -------------- وحياة نور عينينك منك خلاص هاتظيط -------------- الدنيا من حواليك أعصابنا معاك هاتشيط -------------- إرحل وأنا أبوس رجليك 2 نزل الجمل بما حمل -------------- مّوِتوا أجمل ما فينا لبست ثوب الحمل -------------- وغرزت نابك فينا الثورة بدر اكتمل -------------- نور سواد ليالينا ما تقوللي إيه العمل -------------- على فين أنت مودينا فقدنا فيك الأمل -------------- عرض اكتافك ورينا 3 يابو دبورة ونسر وكاب -------------- وطبنجة وبندقية العيشة معاكوا هباب -------------- خسارة فيكوا التحية مِنك دوقنا العذاب -------------- وما شوفنا غير الرضية للثورة معاكوا حساب -------------- على قتل الثورجية وبهية قلبها داب -------------- وولادها راحو ضحية إرحل من غير عتاب -------------- قعدتكوا ما هِش طرية 4 إياك فاكر إنك -------------- الثورة كنت حاميها الثورة غصب عنك -------------- ربك هو اللي حاميها ماكنتش تيجي منك -------------- عمال تعاكس فيها احنا احترمنا سنك -------------- ياللي مالكش فيها الثورة ناوية تجِنك -------------- مش ناوية تِرجع فيها إرحل بقى على خُنّك -------------- ايام وبنقضيها 5 رَقَصْت طره على التت -------------- غنوا نهاوند وسيكا عريت الواد والبت -------------- وكدبت على ماما أمريكا فضيحتكوا كانت ع النت -------------- بالطبل والمزيكا روح شوفلك قصة وفت -------------- كفاية شغل الشيكا بيكا أنا عقلي خلاص هايشت -------------- سيبك من البوليتيكا 6 سنة على دا الحال -------------- ناس تايهة وناس مخاطيف وناس مشغولة البال -------------- بتدور ع الرغيف ثوار وهدوا جبال -------------- نايمين ع الرصيف عليهم قولتوا عيال -------------- طلعوا شباب حريف مديت للود حبال -------------- مع عصابة ُطراريف ومدام ليهم ميال -------------- روح أقعد جنب نظيف 7 مايكونش لسه فاكر -------------- إن الجيش ده مش جيشنا اقرأ التاريخ وذاكر -------------- وحذاري بيه تهوشنا طلعت للثورة ناكر -------------- ليل مع نهار داوشنا لجميلك الكل شاكر -------------- ووجودك بينا راوشنا كفاية حكم عساكر -------------- إغرب بقى عن وشوشنا 8 فيه كل يوم مجزرة -------------- وكل يوم فيه أزمة العيشة بقت مسخرة -------------- والثورة عليكوا عازمة والناس مستنظرة -------------- والنفسية منهزمة خطاويك متأخرة -------------- ووجودك ماله لزمة والبورصة متدهورة -------------- ولبسنا الشراب ع الجزمة 9 بتلفوا علينا وتدوروا -------------- دخلتونا في متاهات سلطوا علينا فرافيرو -------------- والواد عبده جنايات مجزرة أمام ماسبيرو -------------- وكم عركة ف الكيت كات والحالة بقت على الزيرو -------------- وكترت أوي الخناقات أنا كنت فاكرك هيرو -------------- ياللي بتعري البنات ارحل ما عدناش عارفين بكرة -------------- السبت ولا التلات 15 ياعم باقولك ارحل -------------- لاجل العمار يسود الجيش خلاها خل -------------- علينا عاملين أسود الكل منك مل -------------- لثكنك لازم تعود الثورة نورها هل -------------- شم ملت الوجود بهية ازاي تتذل -------------- ودمعها على الخدود عزمها عمره ما كل -------------- دايمًا قدها وقدود أنا عقلي مني اختيل -------------- إرحل ومكانك ع الحدود 11 قولت لناست شهور -------------- لكلامك ما حد كدب رقعت في الدستور -------------- والكل بقى يتعجب عايز تقوللي الشرطة -------------- ناوية خلاص تتأدب ارجع وقولك يبقى -------------- هيفاء وهبي هاتتحجب 12 ميت جنحة وميت جناية -------------- ودماء ع الارض سالت ورا كل حادثة رواية -------------- عن لهو خفي كان فايت ناقص تقول حداية -------------- عملت عملتها وطارت بتدور على أيه ورايا -------------- كل الأدلة زالت بنولول كيف الولايا -------------- وبهية للهم شالت خليك شوية معايا -------------- ياللي عيارك فالت قوم بص في المراية -------------- هاتلاقي الطرف الثالث 13 الناس اتفق دماغها -------------- من مشوار التحرير شرف بهية تمرمغها -------------- كان لازم لشرفها تغير وماما أمريكا بتدلعها -------------- وسبت الطيارة تطير قولي ازاي هاترجعها -------------- دخلت بؤونه ف امشير إذا كنت ناوي تولعها -------------- الثورة عايزة التغيير 14 الصبر مني فاض -------------- فاحت خلاص الريحة دم خالد وعماد -------------- على جبينك فضيحة سيبك من العناد -------------- صاحببك راقد سطحية منك زهقوا الولاد -------------- غقبلي مني النصيحة شيل ايدك من ع الزناد -------------- بهية ماهش قبيحة وحياة رب العباد -------------- الثورة منك جريحة مستنظرين الميعاد -------------- ضيافتك دي مشريحة الظلم زاد في البلاد -------------- والثورة قالتها صريحة الثورة ضد الفساد -------------- الثورة ضد الشبيحة 15 قبل الخروج الآمن -------------- ىمن برب البرية وكمان لازم تأمن -------------- بالثورة والثورجية وتكون للشهداء ضامن -------------- قصاص قبل الدية وتمضي ضامن متضامن -------------- لحق العيال والولية وفين حق المواطن -------------- بعد ما بعت القضية فين هو بس العيش -------------- فين هي الحرية فين هي الكرامة -------------- فين هي الانسانية فين هي العدالة -------------- بيقولوا اجتماعية عايزين نعيش في سلام -------------- وبهية متهنية لك مني ألف سلام -------------- لك مني مليون تحية وكمان تعظيم سلام -------------- على شرف العسكرية