ولسه موال بورسعيد ما نتهاش ياولاد قال أحمد القزعة لعبده شمة: ما اسمعش نفسك ياغيبوبة عشان نفهم الموال من أول ياليل ياعين لحد تصبحوا علي خير. وقال عبده شمة: بس انت يا تافه خلينا نسمع الموال.. جول ياعم أحمد. قلت: بورسعيد في بداية الأربيعينيات من القرن العشرين هي اللي فتحت أحضانها لشاعر الشعب بيرم التونسي وفي منتهي السرية بعد عودته من المنفي الذي استمر 18 عاما بالتمام والكمال وتعالوا نشوف بيرم وهو بوصف هذه اللحظة. في بورسعيد السفينة رست تفرغ وتملا والبياعين حوطونا بكارت بوستال وعملة لكن بوليس المدينة ماتفوتش من جنبه نملة يابورسعيد والله حسرة ولسه يا اسكندرية * هتف لي هاتف وقال لي انزل ومن غير عزومة انزل دا ربك تمللي فوقك وفوق الحكومة انزل دي ساعة تجلي فيها الشياطين في نومة نطيت في ستر المهيمن للشط ياحكمدارية قال عبده شمة: - وي ياولاد تمنتاشر سنة منفي ليه امال هو كان عمل ايه قلت: الحكم كان منفي طول العمر لكن بيرم قرر العودة السرية رغم الحكم الجائر لأن عشقه لمصر المحروسة كان أقوي منه ومن حكم الملك وتساءل أحمد القزعة: هو الملك اللي أمر بنفي بيرم قلت: هو بعينه ياقزعة لأن الشاعر العظيم أهانه حين قال ولما عدمنا بمصر الملوك جابوك لنجليز يافؤاد قعدوك تمثل علي العرش دور الملوك وفين يلقوا سافل نظيرك ودون * وخلوك تخالط بنات البلاد علي شرط تقطع رقاب العباد وتنسي زمان وقفتك يافؤاد علي البنك تشحت شوية زتون * بذلنا ولسه بنبذل نفوس وقلنا عسي الله يزول الكابوس ما نا بنا إلا عرشك ياتيس التيوس لا مصر استقلت ولا يحزنون وقال عبده شمة: وي وي وي ياولاد دا كلام واعر جوي. قلت: كلام رصاص وجتت نحاس ياحاج عبده وقال أحمد القزعة: فهمت ياغيبوبة! اقطع دراعي ان كنت فاهم حاجة. قلت: ودا كان مجرد كوبليه من موال بورسعيد والآتي أهم.
