يا جمهور مصر الغالي أشاطركم الاحزان النهاردة وبكرة وطوالي تاركم في رقبة اللهو الخفي والأندال اللي ف بالي!! إلي محافظ بورسعيد المعزول اللواء محمد عبدالله: بيقولك أبوالعربي احنا زعلانين ومتغاظين وبيحلفك بالقنال والمرشدين والفلوكة والولاد الصيادين اللي قالك ما ترحش ماتش المصري مين..!! إلي الدكتورة ايناس عبدالدايم رئيس الأوبرا: اللي الأوبرا والموسيقي في دمها شرف كبير للأوبرا ان تنسب لها وتكون حارس أمين علي فنها.. مبروك..!! إلي ماما أمريكا: الحق مش عليكي في اللي انتي فينا بتعمليه الحق ع اللي سابك تحكمينا وتحكميه.!! ويوصلونا للضياع الليّ إحنا فيه..!! إلي المشير محمد حسين طنطاوي رئيس المجلس العسكري: نحيط علم سيادتكم ان اللهو الخفي اللي محير الحكومة كلها هوة اللي غرق مصر في همها وفي استاد بورسعيد سيح دمها!! واللي عايز بعد ما يخربها يحرقها ويقعد علي تلها..!! إلي الموسيقار محمد سلطان مدير جمعية المؤلفين: علي رأي فاروق العبيط بياع السميط لما يتلم زعيط علي معيط علي نطاط الحيط..!! ممكن يبيعوا الجمعية بالتقسيط ويأجروا الوطن العربي مفروش م الخليج للمحيط..!! إلي الإعلامي الشاطر كابتن أحمد شوبير: يا صاحب الحوار الكروي الدبلوماسي والجريء واللذيذ..!! مبروك التركيز والبعد عن المناصب والحركات البكلويظ..!! إلي الأستاذ ياسر رزق رئيس تحرير الأخبار: علي رأي عم منسي بماذا أستفيد إذا كسبت العالم وخسرت نفسي..!! إلي الناقد الرياضي الدكتور علاء صادق: بيقولك الأستاذ مالك بلاش هجوم علي نادي الزمالك وهاجم اللهو الخفي اللي رمي الكورة المصرية في المهالك!! إلي اللواء نبيل خلف شاعر الأغاني: بيقولك أبوبهية شاعر الأغنية الشعبية عشان ينوبك ثواب في الإذاعة المصرية من الفلوس إياها انتج لنا من تأليفك كام غنوة وطنية!! إلي المجلس الأعلي للقوات المسلحة: بيقولك الحاج عوضين عمدة كفر شبين وحياة مقام السيدة والحسن والحسين تقوللنا انتو واخدين مصر ورايحين علي فين!! إلي وزير العدل أبودم خفيف: بيقولك الحاج لطيف علشان ما يحصلش في القرآن غلط أو تحريف المرة اللي جاية افتح قدامك في مجلس الشعب المصحف الشريف!! إلي الإعلامي محسن عرفة إذاعة الأغاني: برنامج وطنيات اللي بتقدمه علي شبكة إذاعة الأغاني أعاد للأغنية الوطنية شبابها الأولانى تستاهل التحية والتهاني!!
