* إلي رئيس وزارة الإنقاذ الدكتور كمال الجنزوري ولامصرع القهاوي ملطوعين..!! ومصنع أدوات طبية في أكتوبر بيستورد عمال من الصين سوطي يا أم حسنين..!! ع اللي عاملين ودن من طين وودن من عجين..!!! * إلي الزعيم الخالد جمال عبدالناصر بيقولك الشعب الثاير هلت علي مصر البشاير مبروك ثورة 23 يوليو خلفت 25 يناير..!!! * إلي الاعلامي معتز الدمرداش ياصاحب الحوارات المعقولة بالبساطة والحيادية والسهولة تستحق جايزة الحوار الذكي من الدرجة الأولي..!!! * إلي نجم مصر الكابتن محمود الخطيب قلوبنا معاك سبقاك بتدعي لك هنا وهناك ترجع بالسلامة وكلنا حنستناك..!!! * إلي الرئيس السابق حسني مبارك يامتهم يامتدلع ياريت تخلع قبل البلد ما تولع..!!! * إلي الدكتور حسن أبو العينين مدير مركز المسالك بالمنصورة اللي يحرسوا كلاوي المصريين والمسالك وينوروا ليلهم الحالك..!! ربنا ينصرهم وينجيهم من المهالك..!!! * إلي رجل الأعمال المهندس نجيب ساويرس بيقولك الشيخ عمر انت راجل محترم ومعتبر سيبك من تلاكيك البشر..!! ياعم نجيب لا يقذف بالحجارة إلا الشجر اللي مليان بالثمر.. ياقمر..!!! * إلي حزب الحرية والعدالة علي رأي الحاجة روحية يابتوع الأغلبية حاكموا الحرامية محاكمة علنية ورخصوا اللحمة والعيش وسندوتشات الفول والطعمية..!!! * إلي مجلس ادارة جمعية المؤلفين والملحنين علي رأي ربيع خرابة شاعر الناس الغلابة المال اللي مفيش عليه رقابة يهبروه التعالب والديابة..!!! * إلي أعضاء المجلس الاستشاري علي رأي الحاج عمران مجلس مالوش كيان كبيت من غير عنوان وجوده زي عدم وجوده مش كده والل ايه ياجدعان..!!! * إلي الرئيس السوري بشار الأسد يامتغطي بروسيا والصين وعمال تقتل في شعبك شمال ويمين..!! يوم القيامة اللي حيغطيك مين..؟ وحتروح من ربنا فين..!!! * إلي رجل الأعمال كامل أبو علي رئيس النادي المصري بيقولك المعلم سيد شفطورة اللي يستغني عن طه بصري وطلعت يوسف كمان مهما كانت الضرورة يبقي لا مؤاخذة مبيفهمش كورة..!!! * إلي مصر المحروسة علي رأي واحد من الجماهير ربنا كبير يحميكي من الدبابير في ميدان التحرير ويعدي بكره علي خير..!!! * إلي وزراء الخارجية العرب علي رأي أبو عنترة يارايح سوريا للمنظرة عملت ايه في اللي جري قال اتفرجت ع المجزرة.. وراجع ندمان ايد قدام وإيد ورا ولا نابني غير المشورا..!!!!
