طالب الإعلامي أحمد موسى، الرئيس عبد الفتاح السيسي بالتدخل لتحريك القضية 250، المعروفة بقضية "التمويل الأجنبي"، لمنع خروج الناشط السياسي أحمد ماهر، مؤسس حركة 6 أبريل، من السجن بعد انتهاء عقوبة حبسه في القضية المسماة إعلاميًا ب"أحداث محكمة عابدين"، التي وقعت في 2013. وقال "موسى" خلال برنامجه "على مسئوليتي"، على قناة "صدى البلد": " ماهر مؤسس حركة إرهابية، وبيقولوا إنه خلص مدته وهيخرج، وأنا بسأل: هي فين القضية 250؟ هي فين البلاغات الموجودة لدى جهات التحقيق؟ هو فين التمويل اللي الناس دي أخدته؟ فين قضايا التخابر؟". وتابع: "أحمد ماهر بقاله 3 سنين محبوس ومحدش قادر يحرك قضية ولا يفتح تحقيق؟ وبعد يومين محمد عادل اللي سرق الهاردات والملفات بتاعت أمن الدولة هو كمان يخرج، دي في إعلاميين أخدوا ملفات معاهم البيوت، فين الكلام ده؟ إزاي لم نجد حتى الآن قضية واحدة حُركت، هذه أمور كلها يُعاقب عليها القانون، فين القضايا؟ إزاي ماهر ده يخرج والرئيس مبارك في السجن؟ ده واحد مخرب ومتآمر، لما يخرج النهاردة يبقى بيطلع لسانه ل90 مليون". واستطرد: "نفسي جهة قضائية تقول أين هي القضية 250 أمن الدولة (المعروفة بقضية التمويل الأجنبي)؟ دي فيها كل الأدلة والتسجيلات، طيب إيه اللي ناقص؟ أنا عارف اسم كل واحد في القضية، ده كلنا نعلم جرائم أحمد ماهر وجرائم 6 أبريل، الرأي العام هو صاحب القرار، الشعب مش هيسكت لما يلاقي الخونة دول برة". وتسائل "هل أحمد ماهر ممنوع من السفر ولا لاء؟ هتخرجوه النهاردة وهيسافر بكرة، إحنا دولة قانون، ولا أحد فوق القانون، ويجب أن يتم فتح القضية 250، ونعلم سيادة الرئيس أنك لا تحمي أحدًا وأنك مع دولة القانون، لأنه لا يجب أن يتم قفل هذه القضية ولا الطرمخة فيها أبدًا". شاهد الفيديو:
