أكد الإعلامي خالد الغندور أنه غير مدرك سبب هجوم الكابتن أحمد حسام "ميدو" المدير الفني السابق لنادي الزمالك، عليه خلال لقائه مع الإعلامي عمرو أديب ببرنامج "القاهرة اليوم". وقال خلال برنامجه "اللعبة الحلوة" المذاع على فضائية "LTC": "الناس بتقول ان ميدو اهانك وبيقول ان خالد اتغير ماعدا طوله، معتقدش ان ميدو اللي انا شلته وهو بيبي صغير، معتقدش ان ميدو ممكن يقول كده". وأضاف "الزمالك بعت 6 او 7 لوائل الابراشي، هل ده علشان يغطي على لقاء ميدو، وميدو بيقطع في مرتضى منصور علشان مصلحته وتمت اقالته .. طب ولو مرتضى منصور لو اهلاوي حتى النخاع، ليه ميدو وافق اكتر من مرة، انه يشتغل معاه، ولو مايوكا اسرائيلي طب ميدو لاعبه ليه في ماتش الاسماعيلي". وتابع "مع احترامي للجميع في حاجة غلط، وان اللي بيحصل انتقام بين الطرفين والاتنين غلطانين وعندهم كوارث، وواضح ان ميدو بينفعل في قراراته زي ما عمل مع حسني عبد ربه". واستطرد قائلاً "انا بكل سهولة ممكن اكلم رئيس النادي وهيدخل وممكن كل اللي ميدو قاله عن مرتضى هيترد عليه، بس انا فارق معايا المثل والاخلاقيات .. مرتضى منصور هيبهدل ميدو، وانا ممكن اعمل سبق، لانه ممنوع في معظم القنوات بقرار من غرفة صناعة الاعلام". وأضاف "بس ده لا يمكن يجي دلوقتي على التليفون لانه اكيد دلوقتي شايط وممكن يشتم ويهين ميدو بطريقة رهيبة وبألفاظ خارجة .. وانا لا اقبل ده ويروح في ستين داهية الاعلام والمهنية والمشاهدات". الفيديو..