اسمي وحيد أبو قرن .. واحد فلول كده انما إيه .. حاجة كده على ذوقك .. محسوبك كان دايس ف كووووول حاجة .. لجنة سياسات ماشي .. فساد إداري ماشي .. سرقة وتهريب فلوس البلد ما يضرش .. حضور ماتشات المنتخب كنت ف المقصورة الرئيسية على طول. بس للأسف اليومين دول الحالة نشفت حبتين .. فقررت أكتب مذكراتي وأنشرها على صفحات الجرايد زي النجوم .. يمكن أعرف أقلب من وراها قرشين يساعدوا على تكاليف المعيشة وإيجار الكام قصر العمي اللي حيلتنا ف أوروبا. - يوم السبت 17 مارس 2012 (الحلقة الثانية) النهارده بقى لما صحيت اكتشفت إنه عدى أسبوع كامل على سحب الاستمارات بتاعة (والعياذ بالله) الانتخابات الرئاسية .. الله لا يتمها على خير أبدا .. وحصيلة الأسبوع ده بقى كانت كااااااااااام ؟؟ حاجة كده بتاع 700 مرشح محتمل لعشم إبليس ف الجنة .. إللي هو كرسي الرياسة .. سامحني يا كبير .. دا هم اللي بيقولوا .. إلهي اللي يوصلوا بعدك يطفحوا .. وحياتك أروح بنفسي أحطله بودرة عفريت عشان ما يعرفش يترزي عليه البعيد. المهم .. حسبتها كده .. لقيت المعدل اليومي لوفود المرشحين على اللجنة العليا لانتخابات الرئاسة يبقى مييييييييييييييت مرشح ف اليوم الواحد .. طب والله دي حاجة تضحك .. هاهاهاهاها .. الله يحظهم كلهم .. واللذيذ ف الموضوع إن كلهم من الوجوه الصالحة للرئاسة .. حلاق .. سباك .. بقال .. سواق .. متسول .. مجنون .. فلاح فصيح .. فلاح غير فصيح .. شرابات فانلات .. بسكوت سجاير .. والألذ بقى .. إن في حرامية مترشحين .. هاهاهاها .. يعني مش محتاجين قلة محيطة بيهم تعلمهم السرقة والنهب وشغل زكاروتة واللي زيه .. هييجوا بمهاراتهم جاهزين .. هي دي المؤهلات اللي تنجح الرئيس فعلا. بس بجد أنا مبسو ط .. من ناحية مبسوط .. لأ مبسوط بصحيح .. لسببين: 1. إن جميع فئات الشعب المصري العليا والسفلى والوسطى والدنيا .. ممثلة في مرشحين الرئاسة .. يعني كل ناخب يقدر يختار المرشح اللي يناسب لون الشراب بتاعه. 2. إن دي أكبر خدمة لمصالحنا .. نحن الفلول .. أصحاب الحضارة والتاريخ والعراقة والقيم والنظام .. إنما لما الثورة أسقطت النظام .. ما بقاش في نظام .. ولما ما يبقاش في نظام .. الناس تحن للنظام .. ولما الناس تحن للنظام .. هايقولوا الشعب يريد إعادة النظام .. ولما الشعب يقدر يعيد النظام .. هتلاقي النظام عاد في كل أرجاء البلاد .. ومحسوبك بقى لما يلاقي النظام عاد .. انت عارف الباقي بقى. حليب قلبي يا نظام .. والله وحشتني أيامك يا نظ نظ. الحلقة السابقة: http://altaghieer.com/node/33969
