استعرضت صفحة كلنا خالد سعيد على موقع التواصل الاجتماعي "فيس بوك" أسباب ترى أنها المشاكل الحقيقية لحوادث القطارات جاءت وفقا لشهادة" محمود مصطفى" وهو عضو الصفحة عن سكك حديد مصر.. وجاءت كالتالي: كنت واحد من اللي طوروا نظام قاعدة بيانات الحوادث بسكك حديد مصر واشتغلت قبله في نظامي التأخيرات وصيانة العربات قواعد بيانات التلات انظمة دول كنت اطلع عليها دوريا للصيانة ولتعرف ما معنى سكك (حضيض) مصر خد عندك : 1 - مفيش حاجة اسمها قطر بيوصل في ميعاده لدرجة ان السواقين بقوا متبرمجين على كدة 2 - المفروض في جهاز اسمه (ATC) - (Automatic Train Control) وده من اسمه باين انه بيتحكم في توقيف القطارات وتشغيلها عشان الحوادث .. دي كلها متوقفة عن العمل 3 - في حاجة اسمها (رجل الميت)..دي دواسة بيفضل دايس عليها السواق معمولة عشان لو مات (فجأة) القطر يقف اوتوماتيك ويبعت اشاره بكدة... مفيش جرار تدخله الا وتلاقي السواق حاطط عليها طوبة كبيرة عشان ياخد راحته 4 - بالنسبة بقى للحوادث ..ابشركم ان اللي بنسمعه وبنقراه لا يتعدى 1% من حوادث السكة الحديد مقسمة على خمس درجات من الشده.. ومثلا حوادث المزلقانات المسجلة بقاعدة البيانات من بداية السيستم لحد الوقتي عشرات اضعاف ما نسمع عنه بس (ربك بيستر) 5 - في حوادث كمان داخل الجراجات بتاعة القطارات محدش بيسمع عنها وبيروح ضحيتها عمال من السكة الحديد ودي كتييييير جدا اخر حاجة عاوز اقولها : الانظمة دي (وغيرها كانوا حوالي 7 انظمة) كانت بداية التفكير فيها لما كان (محمد منصور) ماسك وزير واللي كانوا شغالين معانا تحليل وتخطيط كان خبراء ايطاليين منتدبين لتطوير الانظمة دي وتطوير السكة الحديد للعمل بالجي بي اس كمان (شوف لدرجة ايه يا اخي) وطبعا بعد الحادث الشهير واقالة منصور جه الوزير اللي بعده عين مدير للسكة الحديد جديد وقف الباقي وسرح الخبرا وفضل اللي شغال شغال (كان المفروض يتطور 4 انظمة كمان وتطوير الموجودين لدرجات افضل واستخراج تقارير وربطها بالخرائط والجي بي اس وطبعا كل ده وقف) وطبعا ده يدل على فشل سياسة (اقالة الوزير) المتبعة تسكينا للالم وطبعا مش هنسى اقول كلمة مديري الي في كل حادثة بيقولهالي : اللي يشوف سكك حديد مصر من جوة لازم يؤمن ان ربنا موجود (انا ناقلها بلفظه) .. الفساد اللي جوة غير عادي وغير متصور وفعلا لولا ستر ربنا تبقى رحلتك الاخيره ..