نشر أحد المحامين ويدعى مالك عدلي، شهادته بخصوص أوضاع العدالة "الشاذة" في مصر على حد وصفه، حيث يروي الحوار الذي دار بينه ووكيل النيابة المسئول عن التحقيق في قضية المعتقل سيف كامل أحد شباب "الوايت نايتس" والملفق له قضية الانضمام إلي جماعة أسست علي خلاف أحكام القانون . وكان نص الشهادة المنشورة عبر صفحته الشخصية على موقع التواصل الاجتماعي "فيس بوك": الكلمتين دول انا بكتبهم لأي حد عاقل في البلد دي أو كشهادة علي واحد من أكثر أوضاع العدالة شذوذا في مصر حضرته بنفسي كمحامي للمتهم/الضحية : النهارده كان موعد جلسة تجديد أمر حبس سيف كامل أحد الشباب المقبوض عليهم في القضية 327لسنة2015 المتعلقة بالوايت نايتس وبالرغم من إني محامي بعض المتهمين فيها إلا إني كمان معرفش هما متهمين بإيه حتي الآن غير اتهام سخيف هو الانضمام إلي جماعة أسست علي خلاف أحكام القانون بدون أي تفاصيل زيادة.. سيف وصل النيابة النهارده حوالي الساعة 12.45 وفضلنا منتظرين لحد الساعة 4.30 علشان يبتدي التحقيق مع سيف .. شاب جميل هادي مركز وبيتكلم بلباقة مقدرش السجن ينسيهاله .. دخلنا لوكيل نيابة فعلا من طراز من الطرز اللي تخليك تكره اليوم اللي انت درست فيه نفس القانون اللي هوا درسه .. قعدنا وسأل سيف عايز حاجة ؟فسيف قالله آه ليا شوية طلبات : سيف : أنا حضرتك معرفش أنا فعلا متهم بإيه ولا إيه الأدلة ضدي ولا اتواجهت بشهود ولا بأحراز .. وكيل النيابة: مش انا سألتك في الاتهامات ؟ سيف: حضرتك كل مرة تقوللي حاجة جديدة وانا مبقتش عارف فعلا انا متهم بإيه .. وكيل النيابة:يعني انت متهم انك التراس بس مش التراس قوي انت متهم امك حاجة جوه الألتراس تبع سيد مشاغب.. وإيه كمان ؟ أنا:آه يعني عملوا إيه ؟ وكيل النيابة مبتسما:بعدين هتعرف يا أستاذ سيف: انتو بتجددولي الحبس في غير المواعيد القانونية وكيل النيابة بصوت خشن وبلهحة تهديدية : انت هتعلمنا شغلنا ولا إيه ؟ وبنفاد صبر :هاه في حاجة تاني ؟ سيف : في التجديد اللي فات انتو جددتولي في السجن في غير حضور المحامي بتاعي ودا مش قانوني وكيل النيابة : وانا هجيبلك المخامي بتاعك منين؟ سيف : كان موجود قدام السجن واترفض دخوله وكيل النيابة بسخرية: وانا بقي هطلع اجيبهولك يعني ولا ايه؟ مدخلش ليه ؟ سيف : حضرتك كان فيه تعليمات انه ميدخلش وكيل النيابة موجها كلامه ليا :طلباتك يا أستاذ أنا :المتهم لسه مخلصش وكيل النيابة بنرفذة لسيف:كمل يا سيدي سيف : حضرتك المحامي بتاعي طلب سماع شهادة شاهد نفي ومتوافقش علي طلبه لحد دلوقت وكيل النيابة: بعدين نشوف سيف : لو سمحت لو هيتجدد حبسي عايز اتمكن من الاستئناف بدون تعنت وكيل النيابة ليا وكأنه مسمعش حاجة:طلباتك يا استاذ أنا:حضرتك دا اول حضور ليا ومعرفش حاجة تقريبا عن القضية وعايز اطلع وكيل النيابة:معندناش اطلاع أنا:دا مش قانوني وبعدين لما مطلعش هشتغل ازاي ؟هوا انا حاضر كارنيه ؟اثبت دفوعي ازاي في اتهامات انا معرفهاش اكذب ادعاءات الأمن الوطني ازاي لو انا معرفهاش ؟ وكيل النيابة: انت أول مرة تشتغل في نيابة امن الدولة يا استاذ؟ انا: لاء انا هنا من ايام المستشار فلان وفلان في إشارة الي اني بشتغل قضايا امن دولة لما كان هوا مثلا لسه متخرج او كان ف نيابة المرور ولا حاجة وكيل النيابة للسكرتير:وريني يابني كارنيه الاستاذ ..ولما شاف الكارنيه قاللي مانت فعلا قديم اهه امال اطلاع ايه اللي بتطلبه ؟ انا: هوا زمان مكانش فيه اطلاع ولا ايه ؟ الكلام اللي حضرتك بتقوله غريب وفوق طاقتي علي الاستيعاب وكيل النيابة:حتي لو فيه انا معنديش اطلاع ..قدم طلب للمحامي العام انا:قدمت ست طلبات ومتردش عليهم وكيل النيابة :شفت بأي عادي أهه انا:لو سمحت انا عايز اثبت دا ف محضر التحقيق وكيل النيابة:اتفضل يا استاذ انا ابتديت اثبت منعي من الاطلاع وأوجه الإخلال بحقوق المتهم لقيته بقي مهستر ورافض يثبت كلامي وقاللي مغيش اخلال بحقوق المتهم ولا حاجة احنا كده أنا: فيه قانون هواللي بيقول كده مش كلام حضرتك ..عموما وابتديت اتكلم في اخلاء السبيل وطلبت الانفراد بالمتهم عقب التحقيق لقيته قاللي لو مكنتش عايز تثبتها في الورق كنت هخليك تنفرد بيه بس مش هتنفرد بيه ..قلتله كتر خيرك هزوره ف السجن بسيطة. القضية دي ف تلت تحديدات انا قدمت فيها 23 بلاغ وشكوي وطلب للنائب العام اللي تم اغتياله والقائم بأعماله دلوقت وللنائب العام المساعد والمحامي العام لنيابات الاستئناف والمحامي العام لنيابات أمن الدولة .. ولا واحد فيهم اتبت فيه أو اترد عليه أو اتنفذ لدرجة اني ابتديت افكر اعتذر لأهالي المتهمين عن استكمال القضية لأنهم طبعا ودا حقهم مش مصدقين اللي بيحصل وبيتعاملو معاه بشك وهما فاكرين ان اولادهم في الظروف دي والهبل دا مممن يطلعوا بسهوله ..وانا مش قادر اقوللهم ان ولادكم مش متهمين ولادكم أسري نظام قذر وجبان وأعمي ودي صورة لوضع العدالة وطريقة شغل المحققين دلوقت ..مخالفات دستورية وقانونية بالجملة وانتهاك لحقوق المتهمين وحقوق دفاعهم بشكل لم يسبق له مثيل وكله بيتطرمخ عليه ومبيتحققش فيه من أكبر راس لأصغر راس..اوضاع مقلوبة لدرجة ان المتهم ومحاميه بيتحايلو عالمحقق علشان يعرفوا تحديدا اتهامات المتهم ايه .. وفي الآخر يقوللك العدالة مغلولة بالقانون ؟قانون ايه لامؤاخذة ؟العدالة كده مغلولة بس #دولة_الظلم
