قال الفنان بيومى فؤاد، خلال الجزء الثانى من حلوله ضيفا ببرنامج واحد من الناس مع الإعلامي عمرو الليثي على شاشة الحياة، إن هناك حلما بخاف منه وشاهدته كثيرا من طفولتى، وهو أن هناك كلب بيجرى ورايا وأنا بلعب كورة وصوتى مش طالع . وتابع بيومى لو أحضرت عفريت يدخل علينا دلوقتى الاستوديو يبقى الفنان أحمد فتحى لأني أحب أقعد معاه ونضحك ونهزر، ولو من الميتين يبقى عفريت امى الله يرحمها بحبها أوى . وأشار بيومى فؤاد أن من القرارات التي اخذتها وفتحت عليه باب شر هي المسرح، ونفسي أقدم مسرح دولة لكن لسه ماجتش الفرصة . وعن الشخص الذي نفسي أضربه أجاب أوس اوس، لأن لسانه طويل حتى انه في عزاء حماة عمرو الليثى بقوله محدش يجيلك في حاجة وحشه، فرد لا هتيجى انت مش بتفوت حاجة . وقال الفنان بيومى فؤاد، أنا كنت مستصغر نفسي على الجواز على طول وكنت بتكسف أقول لأي بنت أنى معجب بيكى، ولهذا السبب تزوجت على كبر، وكنت دائما بحب من طرف واحد. وأضاف بيومى، خلال الجزء الثانى من حلوله ضيفا ببرنامج واحد من الناس مع الاعلامي عمرو الليثي على شاشة الحياة: أنا في حاجات كتير أخفيها عن مراتى منها أنى بشرب سجاير من وراها، ومن الحاجات اللى بخبيها عليها انى كل سنة كنت بوعدها أنى مش هعمل مسلسلات في رمضان، وأخفي عليها وبعدين بمضي شغل في رمضان، و زوجتى ما تعرفش أنا رايح فين وجاي منين، وأنا بطبعى لو حد كلمنى وقالى تعالى عاوزك ما اسئلوش عاوزنى ليه، وأمى هي اللى علمتنى اسبها علي الله وبلاش مقاطعة، لكنى لا يمكن أكذب، وعمر زوجتى ما اتجسست عليا، والحمد لله لم يتم كشفى في حاجة لحد دلوقتى لأن مراتى زعلها وحش أوى والحمد لله ما جربتش لحد دلوقتى. وأضاف بيومى فؤاد، إن هناك معجبات كتير بى لأنى لطيف، والتقل عندى أنا مولود بيه طبيعى، و بكره الكلام في التليفون، ومعرفش اجيب دباديب، وأنا ومراتى عمرنا ما قولنا لبعض في عيد جوازنا كل سنة وأنتى طيبة، وفي أعياد الميلاد اهتمامنا أكتر بولادنا .
