قال الإعلامي توفيق عكاشة إن من أدخله السجن، قبل عدة أسابيع، هو الرئيس عبدالفتاح السيسي شخصيًا. وأوضح، خلال حلوله ضيفًا على برنامج «مصر اليوم» على قناة الفراعين، مع الإعلامية حياة الدرديري: «الرئيس عبدالفتاح السيسي يعلم إن أنا في السجن من أول ما اتقبض على لغاية ما طلعت وأنا متأكد لأن أنا بعت لمدير مكتبه، مش عشان يطلعني ولا عشان يتوسطلي، لا عشان أتأكد مين اللي عمل في كدة، وزير الداخلية؟ أشك، رغم إن أنا هاجمته وبشراسة بس أشك، فكان لابد أن أتأكد ويستقر في نفسي». وأضاف: «اللي دخلني السجن يا أستاذة حياة هو الرئيس عبدالفتاح السيسي شخصيًا عشان أبقى خلصت ضميري من الله» وتابع «عكاشة»: «مسؤولية الرئيس السيسي عن حبسي مسؤولية أدبية كاملة، بمعنى إن مدير مكتبه والمقرب إليه كان يعلم إن أنا في قسم مدينة نصر، احنا هنعتبر إن هو كان في إجازة يوم الجمعة، طبعًا أنا مقبوض على فجر الجمعة، إشمعنا فجر الجمعة، ليه؟ عشان حتى لو تعاطف معي رجال القضاء فيوم الجمعة إجازة فيتم إذلالي وكسر أنفي، فأقعد بقى لغاية بعد الصلاة، يبقى أنا قعدت في أوضة مساحتها متر في متر من الساعة 6 الصبح لغاية الساعة 2 الظهر على أقل تقدير». واستطرد: «اعتبرنا إن محدش يعرف وبعتنا الرسالة على التليفون، مش علشان حد يعملي واسطة، لأن أنا معايا قرار النائب العام بوقف تنفيذ الحكم، فمتأكد، في غرامة 10 آلاف جنيه، فلما اتقبض على في اليوم ده وأنا عارف إنه الجمعة وقال لي عليك حكم تبديد، قلت له حكم تبديد إيه يا عم قول كلام غير ده، قال لي والله هو ده اللي عندي، قلت له وإيه تاني، قال لي 10 آلاف جنيه غرامة، قلت له ندفعها، قال لي النيابة قافلة لازم تتعرض على النيابة، فقلت يبقى هم هيبيتوني الجمعة وأعرض على النيابة يوم السبت أدفع ال10 آلاف جنيه». واردف: «فوجئت بأن هناك إرهابيًا ومتآمرًا وشخصًا سيئًا دمر هذا الوطن اسمه توفيق عكاشة، أسوء من أنجبته مصر توفيق عكاشة، بيرحل على سجن المزرعة، وبيدخل السجن، بأسوء أنواع المعاملة، بأسوء ما يمكن أن يعامل إنسان على مدار يوم الجمعة، إلى أن وصلت السجن اختلفت المعاملة 180 درجة، أنا راجل قليل الأدب عشان أتعامل كدة؟ أنا راجل خاين؟ أنا راجل ماشتغلتش بإخلاص؟ ده أنا راجل حطيت كفني على إيدي 4 سنين، مفيش واحد قال لي شكرًا».
