فلان: هو لمؤاخذة عم الحاج "كارتر" رئيس أمريكا علي المعاش بييجي مصر يعمل إيه. علان: أكيد عنده لقمة عيش من المؤسسة بتاعته. فلان: وهي المؤسسة دي بتشتغل في إيه بالظبط؟ علان: في السياسة طبعا.. امال هيكون عنده فرن افرنجي! فلان: عشان كده كبار المسئولين بيستقبلوه بحرارة. علان: الراجل "كارتر" خبرة.. عمل حديث صحفي في مجلة "تايم" الأمريكية وقال إن مصرعايزة 10 مليارات دولار. فلان: وتفتكر الإدارة الأمريكية هتسمع كلامه؟! علان: وليه لأ.. ماهو شغال جس نبض.. وأكيد كان بيبص علي الانتخابات والذي منه وهيقول للمعلم أوباما. فلان: يا أخي الميزة في أمريكا ان كل رئيس بيطلع علي المعاش ربنا بيفتحها عليه من أوسع أبوابه.. لكن عندنا في العالم العربي الوضع مختلف. علان: طبعا.. لأن الشعوب هي اللي بتطلع علي المعاش ومابتعرفش تنزل!