قال الصحفي ماجد الهوارى، أحد شهود العيان في مذبحة استاد الدفاع الجوى، إن حكم المباراة ولاعبي أنبي وعمر جابر، كانوا على علم بمايحدث خارج الإستاد، إلا أن الجميع أستمر في اللعب، باستثناء عمر جابر، الذي قال صراحة "لن أكمل الماتش". وأكد الهواري، في شهادته، التي أدلى بها تحت عنوان "كان زماني في المشرحة ولذلك أقسم أني سأقول كل حرف بصدق مهما يحدث"، أنه أبلغ حكم المباراة بوجود قتلى خارج الإستاد، موضحًا أن دخوله الملعب متأخرًا بعض الشيء أتاح له الفرصة لرؤية المشهد على أرض الواقع. وقال الهواري: "طول عمري بدخل الملعب من الباب الرئيسي المرة دى لقيت زحمه غير طبيعيه قلت ادخل من باب الفندق اللي بعده معرفتش برده ادخل من الزحمه رحت طالع قدام شويه ركنت عربيتي نزلت رجعت على رجلي، أنا راجع فى ممر زى نفق كده تابع للقرية الاوليمبيه، أنا ماشى بسأل واحد من الوايت نايتس هما ضربو كده من نفسهم، رد عليا قالى لا الصراحه ولعنا فيهم شمروخ و قعدنا نهوشهم، قامو جريو ورانا و ضربونا بالعصيان و ضربو علينا غاز". وأضاف، "مفيش خطوتين انا بكلمه ببص لقيت ناس عماله توقف عربيات الاسعاف و تركب ناس مش فى دماغى خالص، بفكرهم مغم عليهم ببص تحت فى الممر اللى شبهه النفق ده لقيت ناس مرميين و مابيتحركوش، وقفت معاهم مش مصدق المنظر عربيه الاسعاف خدت5 ورفضت تاخد تانى، طلعنا من الممر حوالى 6 وكان فى حوالى 3 رصناهم جتب بعض على الطريق عشان نركبهم اى عربيه اسعاف تيجى". وتابع، "احنا واقفين جنبهم انا و حوالى 5 تانى الاقى 3 عربيات مدرعه و عربيه امن مركزى من بعيد جايين علينا بسرعه مهوله و بيضربو قنابل وقفت و عمال اشاورلهم و اقولهم لالالالالا ، و اشاورلهم على الجثث وهما ولا هنا طلعت أجرى على الطريق الناحية التانيه و بعد ما عديت من العربيات بأعجوبة ببص وراية لاقيت مدرعة عدت من على الجثث و واحده تانى فرملت على أخر لحظه كل ده و الغاز أصلا مش مسيل للدموع ده حاجه سامه كنت بموت و مش قادر أتنفس". وأضاف، "طلعت أجرى لحد الباب الرئيسي لقيت لواء واقف طلعتله الكارنيه قولتله انا صحفى و اقسم بالله فى ناس هناك ماتت و العربيه داست عليهم اللى لسه طالعه من هنا بصلى اوى و سكت، دخلت الاستاد جوه في الملعب تحت روحت للحكم "محمود البنا" و هو صديقي قولتله يا بنا في ناس بتموت بره سكت و رجع تانى بعد ما كان هيعمل إحماء و قالهم ايه الوضع راح "وليد مهدى" قاله تعالى ندخل الغرفه و خده مع لواءات و المراقب و محمد صلاح و طارق العشري و اتكلمو جوه و خرجوه كملو إحماء". وتابع، "كنت منهار جدا و مش مصدق اللى شفته الزملاء المصوريين في الملعب قعدوني عالدكه بتاعة لاعبى انبي و لاعبى انبي عرفو القصة كلها و فكروني بكدب عليهم، عمر جابر عرف و حلف انه ما يلعب الماتش عبد المنصف سمع و أتصدم اقسم بالله ده كل اللي حصل".
