دعت حركة ضنك للتظاهر يوم 9 سبتمبر احتجاجًا على سوء الأوضاع الاقتصادية، وفشل الحكومة في إدارة ملفات الدولة، واستمرار الانهيار في ملفات الاقتصاد، والكهرباء، الصحة، والتموين، والخدمات العامة، واختفاء السلع الرئيسية. واتهمت الحركة في البيان الذي قالت إنه الأخير لها قبل التاسع من سبتمبر المقبل الحكومة ببيع الوطن لصالح من وصفتهم بأصحاب رأس المال الفاسد، على حساب الفقراء من الشعب. وأعلنت الحركة عن فعاليات التاسع من سبتمبر المقبل بالتظاهر أمام المؤسسات الاقتصادية التابعة لمن وصفتهم برجال أعمال النظام، والاعتصام داخل المترو احتجاجًا على رفع الدعم عن الطاقة، والوقود، وارتفاع أسعار وسائل النقل العامة والخاصة. كما دعت الحركة للتظاهر أمام المجمعات الاستهلاكية في كل المحافظات احتجاجا على اختفاء السلع الأساسية، ومنظومة التموين الجديدة، وأمام المستشفيات الحكومية احتجاجا على سوء الخدمات الطبية ومنظومة التأمين الصحي. وجاء نص البيان: "باسم الله.. باسم الغلابة والمطحونين، حانت ساعة الغضب الشعبي ضد المستعمرين الجدد للوطن اللى بيتستروا ورا راس المال والاستثمار الأسود اللي بيكبر من دم الشعب. زادت الأعباء اليومية على المواطن الفقير وبقت فوق احتماله و بقت مابتتناسبش مع 40% من الشعب اللى بيعيش تحت خط الفقر. كل الخدمات الرئيسية في الدولة تراجعت، فانهارت شبكة الكهرباء واتلوثت واتقطعت ميه الشرب واختفت السلع الأساسية بشكل ماحصلش قبل كده ولا عدا على مصر حتى خلال 30 سنة من الفقر والجوع تحت حكم مبارك وبقى واضح جدًا للكل أن الحكومة شغالة على مخطط لبيع اللي فاضل م البلد، وبتدوس أكتر ع الشعب كل ما صرخ أو علا صوته، علشان تسلم الحكومة مفاتيح البلد لأصحاب رؤوس الأموال ويبقى شعب مصر عبيد عند شوية حرامية وأصحاب مصالح، ويعيش المصريين في ظلام اكتر وفقر وجوع اكبر وظلم وقهر ومرض عمره عليهم ما يقدر. الشعب عمره ما هيفضل أسير لحكومات فاشلة بتتنافس على بيع الوطن الشعب عمره ما هيقف متكتف قصاد حكومات فاشلة بتلعب بمستقبله.. ومانجحتش في أي امتحان دخلته الشعب عمره ما هيقف يتفرج على حكومة بتموته بالبطيء لما ماتوفرلهوش علاج ولا سرير يتعالج عليه موعدنا 9/9 علشان نوقف محاولات بيع اللى باقي من الوطن مهما كان التمن موعدنا 9/9 ثوره شعبية تحركها الغلابة ضد العصابة موعدنا 9/9 عند المجمعات الاستهلاكية ضد الفقر وضد الجوع موعدنا 9/9 عند المستشفيات الحكومية .. ضد إهمال الرعاية الصحية موعدنا 9/9 عند مصالح رجال الأعمال الفاسدين ضد الفساد موعدنا 9/9 هنعتصم جوه المترو ضد رفع الدعم عن مواصلات الغلابة لصالح العصابة موعدنا 9/9 ثوره الغلابة .. ثورة مش هيوقفها استبداد ولا قهر.. المطحونين همة اللى هيصنعوا بكره اللى جاي".