شن أحمد المغير - أحد القيادات الشابة بجماعة الإخوان - هجوما شرسا على قيادات مكتب الإرشاد منتقدا ترك الشباب وحدهم داخل مقر الإخوان. وقال في تدوينة على حسابه ب"فيس بوك": هوا أنا ليه مشفتش حد من قياداتنا معانا في المركز العام أمس؟ يعني كانت إيه الرسالة الإيجابية الرائعة اللي ممكن يوجهها لينا أي عضو في مكتب الإرشاد بتواجده معانا من الصبح لغاية بالليل ومعيشته معانا كل التطورات الميدانية والإيمانية والنفسية؟ هوا أنا ليه بستنى على طول مشهد محمد الفاتح اللي في الصف الأول من الجيش ومبشوفهوش؟؟ وأضاف في تدوينة أخرى: على فكرة الإخوان مش هيا قيادات الإخوان ولا هيا شباب الإخوان ولا قواعد الإخوان, الإخوان منهج وفكر وطريقة حياة مستمدة من الإسلام كما نزل على رسول الله, معلش أنا مضطر أصدم البعض دلوقتي لما أقوله إن قيادتك مش ملائكة ومش أنبياء ومش منزهين, أصدمك أكتر لما أقلك إن قياداتك بتخطئ وتصيب.. أكتر حاجة ممكن تؤدي بأي مجموعة إلى الفناء هي إنها متفكرش في أخطائها وتحاول تصلحها وتحاسب المسئولين عنها, أسوأ حاجة في الدنيا إنك تحط إنسان - أي إنسان - في دائرة التنزيه والتقديس إلا لو كان الإنسان ده نبي أو صحابي أو رجل صالح ذكر في القرآن أو السنة.. هتقولي وإيه لازمة الكلام ده كده أدام الناس؟ هقولك وهوا إحنا فيه عندنا حاجة نخبيها؟ هوا فيها إيه لما نقدم للمجتمع نموذج راقي في النقد والعتاب والنقاش؟ إيه المشكلة إننا نكون مثال يحتذى في إدارة الزلات أو المشاكل؟ يا إخوانا إذا اللي حصل إمبارح مش هيخلينا نبدأ نغير من طريقتنا وبعض قناعتنا الخاطئة يبقى هنتغير إمتا؟ ووجه رسالة ساخرة للرئيس مرسي قائلا: سيدي الرئيس حدثت وقائع مؤسفة ترقى إلى مستوى الجرائم ضد الإنسانية ضد مجموعة من المواطنين المصريين المنتمين إلى جماعة الإخوان المسلمين في منطقة المقطم، وإذ أن سيادتكم كنتم قد أصدرتم بيانا من قبل يدين ما تعرض له المواطن حمادة صابر من سحل، لذا فلا أحسب أن تأخركم عن إدانة ما حدث للإخوان المسلمين في المقطم إلا بسبب عطل فني في شبكة الإنترنت في قصر الاتحادية.. أعان الله الرئاسة ووفقها لإصلاح هذا العطل.
