سؤال بحاجة إلى إجابة.. ونحكى بالبلدى.. لأن مافيش أحلى من البلدى.. عشان نفهم وناخد وندى مع بعض.. حَكم الكلام ولا مؤاخذة ( مناولة ).. يعنى إيه واحد يخرج فى برنامج اسمه (انت وضميرك) ويقول على نفسه إنه زور انتخابات مجلس الشعب لمصلحته والكلام دا حصل على الهواء يعنى لا فيها فوتو شوب، ولا دا مش صوتى.. و(السى دى) متفبرك.. دا حتى كمان مرتضى منصور اختفى الله يرحمه بقى.. كان راجل كبرة لا والأكادة أن الملايين سمعوه من أول النائب العام أطال الله فى عمره ونصره على مين يعاديه هاى هيئ، لحدييييييت أصغر محضر محكمة فيكى يا بلد، وبعد كدا يفضل زى ما هو .. مافيش حد قرب منه ولا حتى شد ودنه وقاله.. إيه يا واد يا شوبير دا .. إيه اللى انت عامله دا.. كدا بتحرجنا يا شقى..!!.. طيب يا راجل دارى على تزويرك يقيد ويلعلع.. أوعى يا ( كخة ) تزور تانى عشان اللى بيزور بيروح فيييين اليومين دول ...... أكيد بيروح يقعد على كرسى نائب رئيس اتحاد الكورة .. وبعد كدا ياخد لفة على كرسى عضوية مجلس شعب؟ حدش يا ناس وصل اعتراف شوبير للنائب العام أو الإخوة أعضاء النيابة فى أى مكان فى مصر.. عشان يتعمل أى منظر يقول إن البلد دى فيها قانون .. ومانتفضحش قدام الأجانب شباب الثورة اللى استشهدوا .. عشان مبدأ سيادة بسلامته القانون .. طيب هو مش الاعتراف برضو سيد الأدلة زى ما القانون حدانا بيقول.. وإلا طلع سيد زيان مثلا.. أو أنه كلام ابن عم حديت لزوم التسجيد والقعدة والرجالة الحلوة المنورة.. مش كدا وبس .. دى ظاطت وباضت وفقست واللى قال الكلام دا واعترف وأقر بمنتهى الاستهتار بينا وبالقانون يقوم إيه.. يفضل يقدم برامج فى الفضائيات ويتكلم عن هموم البلاد والعباد ويأمر بالمعروف وينهى عن المنكر.. ويمكن يطلع هو كمان أمير الجماعة اللى السنت لميس بنت سيدنا وتاج راسنا الحديدى .. هاتموت نفسها يا ولداه عشان توصل ليها .. طيب يا سنت لميس أديكى عرفتى عنوان ورقم موبايل ومقاس جزمة أمير جماعة الأمر بالمنكر والنهى عن المعروف أهو .. هااااااااا .. عملتى إيه بقى .. أكيد الدكتور مرسى برضو السبب ..؟؟ .. طبعا السنت .. لا .. ميس .. فى حلقتها اللى عملتها مع المرشحين لاتحاد الكورة ماكنتش مصدقة إن أمير الجماعة قال كدا .. وازبهلت وحوقلت وتفت فى عبها وعملت نفسها من المريخ .. وقالت لا مش معقول الكلام دا اتقال أنا ماسمعتهوش .. !!! يمكن لأن عينيها اللى تندب فيها دانة مدفع آر بى جى مابتشوفش و ودانها مابتسمعش إلا دبة النملة لأى تصرف إسلامى.. عشان الليلة ما تحلوش والصنف المضروب يشتغل .. إلا لما تحط عليهم.. وهيه اللى قعدت من يومين تهيص وتزيط من التزيييط .. مش التزريييط .. لما مدير المخابرات الغلبان حلف على المصحف إنه يصون أمن مصر .. ودى فيها إيه دى طيب يا سنت السنتات ..؟؟ .. مش إحنا بلد إسلامى برضك .. والا نخليه يحلف بالطلاق عشان بنى غلمان يأفوروا ويصهللوا .. يمكن الحلفان على المصحف بيخليهم يفصلوا .. ويبقى القسم الرسمى بعد كدا .. عليا الطلاق بالتلاتة أنى أصون أمن مصر ..!! الحدوتة كبيرة أوى يا جودعان .. ولو حبينا نحيكها يمكن ننافس ألف ليلة وليلة.. عشان كدا أنا باطالب الدكتور مرسى اللى باحبه لله فى لله يسيبه من نظام أطبطب وأدلع .. ويسن سيف مسرور ويدبح على بركة الله.. ومايسمعش كلام المسهوكة شهرزاد وسيبنى لبكرة الله يخليك.. ومايخفش إحنا وراه .. عشان كدا إحنا اخترناه .. مش عشان أمير الجماعة يزور وبعد كدا نلاقيه هوبا إيه .. هوبا آه .. مترشح فى كل انتخابات.. وكأنك يا أبو زيد .. ما قمت بثورة عشان تطهر .. ولا غزيت..
