البت الرخمة جت.. صح مش أول ما لقيتوا المقاله قلتوا كده معلهش إستحملونى شوية. مين فينا ما لهوش صاحب جدع أو أخ ناصح أمين أو زميل بجد بيشكيله همومه وبيفضفض معاه. حتى البتاع النت ده كتير مننا ما صدق لقاه علشان يتكلم ويبعبع من غير ما حد يشوفه، وساعات كتير بيظبط نفسه وهو متضايق علشان ليه قرايب على الفيس وممكن يشوفوا اللى بيكتبه وممكن يعرفوه، صح ولا لأ؟ قولوا الحق! المهم أصحابنا الجدعان دول مش ساعات بيلفتوا نظرنا إننا زعلنا حد، أو إن إحنا ملناش حق نعلى صوتنا كده لأن الموضوع ماكنش يستاهل، أو إن اختيارنا ده غلط ومايناسبناش، لأى حاجة من أول اللبس لحد العرسان والعرايس .. صح؟. طبعا أصحابنا دول بيبقوا مسحوبين من لسانهم زى أختكم كده ماتعرفش تمسك لسانها، تفضل تلف وتدور بالكلام علشان تنقى الكلام المظبوط اللى ينفع تنفد بيه من غير ماتجرح حد. المهم بعد الرغى ده كله، اللى عاوزه أوصله هو إحنا ليه مابنخدش نضارة الناس اللى بتنصحنا دى ونلبسها ولاعدساتهم علشان حبايبنا دكاترة الرمد اللى ماليين الفيس، نشترى عدسات من بتاعتهم ونخليها عندنا لما نقابل موقف زى ده نفتكر إن العدسات موجوده فى الشنطة نطلعها ونلبسها ونشوف الموقف صح ولا لأ. مثلا يعنى لو إحنا سريعى الغضب وبنشيط بسرعه ونقعد نجيب من الشرق والغرب ونزعق ونبقى فرجه، لما بنزعل والناس فى بقها كلمة (إهدى شويه) زى اللبانة، فيها إيه ساعتها لو جبنا عدسات الهدوء وحطيناها فى الشنطه ونطلعها قبل مانفور زى اللبن ونلبسها، ونختفى من قدام اللى مزعلنا أو نعامل الموقف بهدوء شوية ونبان عاقلين. لما الانتقادات بتكتر معناها ‘ن إحنا عندنا عيب معين لازم نغيره، وإلا هانفضل نتكعبل بدل ما نوصل. والتغيير ده أسهل من صبغة الشعر والله، بس المهم النوع والخبرة فى العمايل طبعا البنات والسيدات فهمنى، أما الرجالة زمانهم بيقولوا عليا بلت وأعجن ولا غادة عادل فى الباشا تلميذ. غيروا وبدلوا فى نفسكم علشان تعيشوا أحسن وتوسعوا دايرة أحبابكم وتخفوا التوتر عن حياتكم وحياة الناس اللى معاشرينكم، أهل أو أصحاب أو زمايل. بس خلوا بالكم من الانتقادات اللى الغرض منها زعزعة ثقتكم فى نفسكم، وأنتم طبعا بقيتوا أساتذة فى إكتشافها بعد البلاليع الكتيرة اللى وقعتوا فيها كلكم من أيام إبتدائى والعيال اللى بيتكلموا معاكم فى الحصة وبعدين يبيعوكوا علشان مايتضربوش هما، لحد الجامعه والنفسنة والغيرة، لحد الشغل والزمايل اللى بتبيع وتقولك على الحاجه إخيه وعينها فيه .. فاهمين طبعا أنتوا ناس نتيته وبتفهموها وهى طايرة ماطولش عليكم. إستنونى كل شويه أتسحب كده من لسانى وأقولكم كلمتين من نفسي. فاتن جلال
