علق الإعلامي إبراهيم سعيد، على لقطة جري محمود عبدالرازق شيكابالا قائد نادي الزمالك وراء رامي ربيعة لاعب النادي الأهلي، خلال احتفال لاعبي المارد الأحمر بالتتويج ببطولة السوبر المصري. وحقق النادي الأهلي بطولة السوبر المصري للمرة ال15 في تاريخه والرابعة على التوالي، بعد فوزه ليلة الخميس على نادي الزمالك بركلات الترجيح 7-6 بعد أن انتهى الوقت الأصلي والإضافي 0-0. وقال إبراهيم سعيد في تصريحات تليفزيونية عبر شاشة «النهار»: «أول ما شوفت الصورة والفيديو القصير على السوشيال ميديا افتكرت أن شيكابالا بيجري ورا لعيبه الأهلي عشان رايحين يحتفلوا عند جمهور الزمالك، ولكن الأمر اتضح أنه مش كدة». وأضاف: «أنت يا شيكابالا رايح فين، هو ليه جري وراهم، ورامي ربيعة من الشخصيات اللي مش مشاغبة، وطلع كلام إنه إمام عاشور، بس طلع بردو مش هو، أنا عايز أعرف إنت مالك يا شيكابالا، اللاعيبة رايحة تحتفل مع جمهورها». وأكمل: «هل شيكابالا كان عايز يسيطر على فرحتنا، أو هل كان بيغلوش على موضوع أنه كان سبب الهزيمة بإهدراه ركلة ترجيح، وضيع بطولة على زمايله وجمهور نادي الزمالك، أصل مش فاهم القصة اللاعيبه رايحة تحتفل مع جمهورها أية اللي ضايقك». وأردف: «شيكابالا دلوقتي بقى موجود ومعتمد على اسمه، واللاعيب الكبير اللي بيتشغل لصالح فريقه، مش اللي بيشوف الكاميرا فين عشان يعمل لقطات، مفروض دورك كقائد أنك تبقى بعيد عن الخط أومال لازمة جوميز أية». وأتم إبراهيم سعيد تصريحاته قائلًا: «الزمالك خسر عشان شيكابالا دور على نفسه وكان عايز ياخد اللقطة، ومش عارف الناس اللي بتدافع عنه إية الخوف ده، يا جماعة كل لاعيب وليه سن ومهارته بتقل ومش بيبقى بنفس المعدل البدني فبيضر الفرقة».