شن الإعلامي أحمد شوبير، حارس مرمى الأهلي ومنتخب مصر السابق، هجومًا عنيفًا على مسؤولي نادي الزمالك بسبب أزمة لاعبي الفريق الأبيض في الإمارات المشتعلة حاليًا عقب التعدي على فرد أمن إماراتي عقب مباراة الزمالك وبيراميدز. وقال أحمد شوبير، في تصريحات إذاعية: «من إمبارح والدنيا زايطة، إيه يا جماعة اللي حصل؟، مشكلة بين لاعبي نادي الزمالك مصطفى شلبي ونبيل عماد دونجا ومدير الكرة عبدالواحد السيد مع أحد الأشخاص في الملعب في دولة الإمارات، بلاش فرد أمن، وده عقب مباراة الزمالك وبيراميدز». وأوضح شوبير: «الذكاء لما تحصل لك مشكلة تبدأ تدور لها على طريقة حل وتشوف إيه الأخطاء في الأزمة، صراحة اللي حصل غلط، وإوعى تضحك علىَّ حضرتك وتيجي تقولي أصله مكانش يعرف إنه بتاع أمن، وأنت تعرف جيدا إن في دولة الإمارات مفيش حد بيتواجد في الملعب ملوش دور، إنما أي حد موجود زي عندنا جوه الملعب وممكن يقعد على الدكة أو يرفع معاك كاس بطولة، ده مش موجود هناك خالص الهزار ده مش موجود هناك». وتابع شوبير: «هذا الرجل تعرض لاعتداء، واستغربت قوي وأنا هتكلم واللي يزعل يزعل، وشفت مصطفى شلبي وهو بيطير ويدي الراجل واحدة (هوك) في دماغه وييجي البعض يقول لك أصله لابس فانلة حمرا، هو عيب؟ هو حرام؟ هي الفانلة الحمرا بقت عيبة؟، يعني نقول لأي واحد أهلاوي شايف حد لابس فانلة بيضا اضربه؟، وأي زملكاوي شايف واحد لابس فانلة حمرا يضربه؟، إنتوا عايزين تودونا لفين؟ ما هو يإما يبقى معاقبة من داخل النادي نفسه على الغلط يإما إحنا بنهزر!!». وأضاف شوبير: «عارفين الأزمة الحقيقية إيه؟، هى إن دي أول مرة حادث زي ده يحصل داخل الملاعب يتاخد فيه إجراء، موضوع الاستثناءات إللي إحنا شغالين بيه بيخلي كل واحد يعمل اللي هو عايزه، الإهمال إللي إحنا بنشتغل بيه وصلنا لكده، والتهديد بالسوشيال ميديا ومش عارف إيه، كده غلط وهتكلم والأرزاق على الله». واختتم نجم الأهلي السابق: «أنا كنت منتظر من نادي الزمالك إن عندنا ناس أخطأت والزمالك هياخد قرار وهياخد عقوبة، والأمر سيتم توضيحه، وأعلن عقوبات صريحة».