تحدث خالد الغندور، نجم الزمالك السابق، عن التريندات الرائجة في الشارع الرياضي المصري، والتي تصدرت المشهد خلال الأيام القليلة الماضية بشكل واسع، مسلطًا الضوء على احتفالات الأهلي والزمالك المنتشرة حال فوز أي فريق منهم على حساب الآخر، وكذلك انتشار عبارة الزمالك أكبر قلعة رياضية في مصر، ولاسيما حديث الميديا على المنشطات. وقال الغندور خلال فيديو نشره عبر حسابه الرسمي على موقع التواصل الاجتماعي «فيس بوك»: «الفترة الأخيرة الكورة بعدت عن معناها الحقيقي وراحت لشوية ترندات، اللعيبة بقيت عندها حرص أنهم يقلدوا بعض مش لعيبة الكورة بس ده اليد وقطاع الناشئين والشباب، السوشيال ميديا جننت اللعيبة». وأضاف: «الغريبة كمان الأغاني اللي بنتحتفل بيها بتنتقل على مستوى العالم، ونلاقي فرق تانية بتحتفل بعد ما طلعت تريند، زي سطلانة اللي بدأها الأهلي، وبدأ جمهور الرجاء يغنيها ل الوداد». وأكمل الغندور: «مرورًا بأغنية البحر لو عطشان بتاعت كزبرا الزملكاوية غنوها، وردها الأهلي، ولما رامي ربيعة وعمر كمال عملوا نفسهم نايمين ناصر منسي في الزمالك عمل زيهم». وأردف: «الناس كلها بقيت تحب التريند، بس لعيبة الكورة مفروض تركز الكورة أكتر، وبصوا لنجوم العالم بتتعامل ازاي العقلية بتفرق جدًا». وواصل نجم الزمالك السابق: «لما بتكسب ولما بتخسر ده طبيعي لأن الكورة مكسب وخسارة، وطبيعي أن الأهلي يقلل من السوبر الإفريقي رغم أنه لو كسب كان مجد في البطولة بصورة كبيرة جدًا، والناحية التانية الزمالك بيجمد في البطولة وده طبيعي لأنه كسبان الأهلي بطل إفريقيا». وزاد: «الأهلاوية بيقولوا دي مباراة واحدة، طب ما نهائي أفريقيا بتاع القاضية كان مباراة واحدة، مكنش في ذهاب وإياب، فنهائي القرن مباراة واحدة والسوبر مباراة واحدة بردو، والسوبر مكنش سهل كل فريق لعب من 14 إلى 16 مباراة عشان يتوج باللقب القاري ويلعب السوبر». ونوه خالد الغندور: «داخلين على السوبر المصري، والأهلاوية نفسهم يكسبوا سيراميكا كليوباترا بأي طريقة، ونفسهم الزمالك يكسب بيراميدز عشان يقابلوهم في النهائي وينهوا التحفيل اللي شغال من بعد مباراة السوبر الإفريقي». كما أكد: «شوفنا تريند جديد وهو (الزمالك أكبر قلعة رياضية في مصر والوطن العربي) لما كابتن حسين لبيب رئيس الزمالك ردده، ومن قبله رئيس الأهلي محمود الخطيب في احتفالية سابقة للأحمر قال أنا فخور إني رئيس الأهلي أعظم نادي في الكون». واختتم الغندور تصريحاته قائلًا: «التريندات دخلت كمان في سكة فضائح اللعيبة، وزعمت أن في لاعب في الزمالك بيتعاطى منشطات وكمان ذكرت اسمه، وكل الكلام ده كذب في كذب وعاري تمامًا من الصحة، وناس بتثير الجدل على أنها بتشرح اللائحة ما الناس كلها عارفة اللائحة».