المقهى تحول فشر قاعات مؤتمرات كبارات البلد والمعلم (مصراوى) القهوجى نازل مشاريب عمال على بطال ولكنه متضايق أصله ما بيحبش الحال المايل وعينه فى وسط راسه.. أصل اليومين دول مفيش سيرة غير فضيحة المنتخب واللى بيحصل داخل كواليسه.. ومفيش فايدة عمنا (ثورجى) يشتاط غيظا من اللعيبة السكندهاند وصديقه (فوريجى) بيزيده غيظا. المعلم (قهوجى): ربنا يكفينا من الصيف وبلاويه واللى بيجرى فيه إهيه ناقصة لما شوية (....) يحرقوا دم 80 مليون! فوريجى: متستغربش يا معلم ده كل واحد من حبايبك اللعيبه جايب له اثنين بودى جارد يحموه أصلهم شبعوا ملايين دولارات ويورو.. ومش فى دماغهم غير السبوبة! ثورجى: الشعب طفحان اللقمة ومش لاقيها.. وهما بيفرقوا الفلوس على البلطجية! فوريجى:أما لو عرفت إن لعيب منهم دعا بعض أعضاء الجهاز الفنى على رحلة نيليه ووليمة استاكوزا من اللى قلبك يحبها.. تقول إيه؟! أصله كان بيخطط لإقناعهم بضمه للمنتخب من باب المجاملة! ثورجى: دول يستاهلوا ضرب (....) والناس لو جدعه ما يرحوش المباريات علشان يتعلموا الأدب ! فوريجى: مشى حالك ياباشا ده فيه لعيب محترف بيجيب معاه علب (فياجرا) من الخارج هدايا لبعض المدربين علشان يهتموا بيه شويه! ثورجى: فياجرا! دول يستاهلوا قطع(....)! فوريجى: تصدق إن فيه نجم كبير اشترى سيارة (بورش) أحدث موديل لأحد أفراد الجهاز الفنى علشان يبقى أساسى فى الفريق.. وهو اللى ضيعنا فى الماتش بتاع الاولاد؟ ثورجى: ربنا يخلى لينا التوك توك! فوريجى: تصور كمان إن فيه نجم أهلاوى سابق بيتردد على نادى الزمالك اللى لعب معاه موسم واحد وضابط نفسه كل يوم خميس علشان يعاكس بنات النادى قامت واحدة جدعة منهم شبعته شتيمة من اللى قلبك يحبها! أقولك على سر كمان.. جوزيه جاب للعيبه الأهلى عقد نفسية وعلشان يلحق نفسه طلب من إدارته طبيب نفسى يعالجهم!.. المعلم القهوجى: عوضنا عليك يارب.