«وقفوني بدون سبب».. سامي سمره يهاجم اتحاد المصارعة (خاص)

هاجم سامي سمره، لاعب منتخب مصر للمصارعة، مساء اليوم الإثنين، الاتحاد المصري للمصارعة، بسبب إيقافه وتحويله للتحقيق أمام المستشار القانوني.
وسبق وأعلن الاتحاد المصري للمصارعة عبر حسابه الشخصي على «فيسبوك» إيقاف السباعي التالي ومن ضمنهم سامي سمره:
1- محمد محمود أحمد فهمي (حكم دولي).
2- هيثم محمود محمد فهمي (لاعب).
3- سامي السيد سمره (لاعب).
4- خالد عادل نور الدين (حكم).
5- إبراهيم محمود حامد غانم (لاعب).
6- محمد محمد صلاح الدين (عضو بفرع القاهرة).
7- جمال جمعه هنداوي أبو طالب (مدرب).
«وقفوني بدون سبب».. سامي سمره يهاجم اتحاد المصارعة (خاص)
تواصلت «المصري اليوم» مع سامي سمره لمعرفة وكشف أسباب إيقاف اللاعب وتحويله للتحقيق.
وعلق سامي سمره «في البداية خرج الكابتن هيثم فهمي في لايف مع أحد الأشخاص عبر منصات التواصل الاجتماعي، هو من أكبر لاعبي المصارعة المصريين وصاحب إنجازات عديدة».
وبين: «وهو تحدث خلال اللايف عن بعض المواقف السلبية التي حدثت معه، وتحدث بكل تحضر».
وأضاف: «أنا دخلت في اللايف ووجهت سؤال لكابتن هيثم، عن طريق كومنت، وكان يتواجد معظم أعضاء الاتحاد في اللايف مثلي، وفؤجت أمس الأحد، أي عقب 3 أيام، نزل قرار على صفحة اتحاد المصارعة المصري على فيسبوك، إني موقوف ومتحول إلى التحقيق».
وتابع: «أنا لست على خلاف مع أي شخص، أنا سألت كابتن هيثم بصفته كابتن كبير، وهو جاوب عليا، والغريب في الأمر إن القرار إللي نزل اتمسح بعد 10 دقائق من على الفيسبوك بعد ما الناس فضلت تضحك ووتريق».
وواصل سامي سمره: «دكتور محمود السيد سكرتير عام الاتحاد المصري للمصارعة، كلمني وقالي قولي يا سامي انت إيه مشكلتك، يعني هو نفسه ميعرفش إيه مشكلتي، ورديت قولت معرفش، وقالي إنه اعترض في الاجتماع على هذا القرار، ونزل على حسابه الشخصي وأكد ده فعلًا، وبعد ما نزل من الاجتماع شاف القرار على صفحة الاتحاد».
وأكمل: «قالي ده مينفعش وكلمهم وقالهم يتشال ولازم يتعدل، وبعد كدة حذفه القرار من على الفيسبوك».
وزاد: «أنا بلعب من زمان وعمري ما هاجمت حد ولا غلط في حد، أنا مش عارف وقفوني ليه، أنا عملت إيه طب حد يقولي، ده في ناس موقوفة وهي في فرنسا أصلا ومتجنس زي إبراهيم الونش وجاب أول عالم باسم فرنسا، وفي ناس في الإمارات وتونس، دول عملوا إيه، كل ده عشان لايف».
واختتم: «أنا بناشد اللجنة الأولمبية لتتدخل، إزاي قرار إيقافي يطلع من الاتحاد مش من اللجنة الأولمبية، هل عندهم علم، لا أعتقد، دي ورقة مش مختومة حتى، وأكثر من عضو اعترض على القرار، وده مش اتحاد بصراحة دي مهزلة وهم».
إنجازات سامي سمره
1- بطل أفريقيا في عام 2018 بدولة نيجيريا.
2- بطل أفريقيا في عام 2019 بدولة تونس.
3- بطل العرب في عام 2018
4- بطل العرب في عام 2019.
5- المشاركة في بطولة العالم تحت 23 عامًا في أكتوبر من عام 2022.
6- المشاركة في بطولة التصنيف العالمي «رانك» في عام 2023.