أكد سيد رياض، وكيل اللاعبين، والمتهم بانتحال صفة اسم نادي تليفونات بني سويف للعب مباراة ودية أمام فريق كاظمة الكويتي خلال معسكر الأخير بالإسكندرية استعدادًا للموسم الجديد. وقال سيد رياض خلال مداخلة هاتفية ببرنامج «الكورة مع فايق» المذاع على شاشة «إم بي سي مصر 2»: «عندي شركة تسويق رياضي اسمها الرياض ومعايا تصريح، وبعمل مباريات تسويقية ودية منذ 10 سنين، وتلك الشركة كانت راعية ل أندية سكر الحوميدية، والبطل الأوليمبي وعدة أندية كثيرة جدًا». وأضاف المتهم بانتحال صفة اسم نادي تليفونات بني سويف: «مع نهاية كل عام من دوري الدرجة الثالثة والممتاز (ب)، بيبقى معايا لعيبة كتيرة مميزة من هذه الدوريات عارفني وعارفين أني مسمع كويس، وطلعت لاعيبة كتير للدوري الممتاز من خلال المباريات الودية التسويقية اللي بعملها باسم شركتي». وأكمل: «تواصل معايا مسؤول ل نادي كويتي معسكر في الإسكندرية والمفروض أن النادي القادسية مش الكاظمة، وبعدها سافرنا وعملنا معسكر في قرية للولاد، مجبتش اسم نادي تليفونات بني سويف من قريب ولا بعيد، ولا بتشيرت ولا بخطاب ولا أي حاجة». وزاد: «ولادي اللي بيلعبوا باسم الشركة بتاعتي بيلعبوا بشعار الشركة والتيشيرتات بتاعتي، واللعيبة اللي لعبت من نادي كسكادا معايا 4 لاعبين منهم، وحرس الحدود والترسانة، وكلهم لعيبة مسجلة في اتحاد الكرة ولعيبة مميزة». وواصل: «الفرقة لعبت المباراة باسم شركة الرياض، واللعيبة كانت لابسة تيشيرت شركة الرياض، ومكنتش أعرف حد من النادي الكويتي غير في الملعب وكنت فاكرة القادسية لحد موصلت وعرفت أنه فريق الكاظمة». وأتم: «اللي تواصل معايا مش أول مرة ينسق مباريات للفريق، ولم اتقاضى مليم أنا كنت بسوق اللعيبة مش أكتر».