فتح إبراهيم سعيد، نجم الأهلي والزمالك السابق، النار، على مسؤولي المنتخب الأولمبي، بسبب أزمة التأشيرات. وقال إبراهيم سعيد في تصريحات تليفزيونية: «عدم الاهتمام بالمنتخب الأولمبي اللي كان المفروض يسافر، تفاجأنا إن مفيش تأشيرات وإنها متأخرة». وأضاف: «احنا هنفضل في الحالة دي لحد إمتى؟ في بعض الناس دخلوا المجال الرياضي وهما مش على دراية خالص. احنا جايين قبل السفر مش عارفين ناخد تأشيرة، هو الموضوع عادي كدة بيعدي؟». وأكمل: «في ناس دخلت المجال الرياضي معندهمش فكرة. هل الإداريين فاكرين إن المنتخب الأولمبي هيسافر بالقطار، فين التأشيرات؟». وتابع: «في معاد عشان تسافر فيه وتتمرن وأنا كلاعيب أحس إن عندي بطولة، لما أنا كلاعيب لما أحس إن المسؤولين عن المنتخب الأولمبي مش في دماغهم أتاخر يوم يومين، هحس إني رايح رحلة. ده ينفع؟». وزاد: «رايح في مهمة وطنية أنتم ليه مش مديينا فرصة نتكلم في الكورة ونشجعكم، ده استمرار للأخطاء والمشاكل. مديين مناصب لناس مش أدها، مجرد مجاملات ناس على حساب ناس وأنت بتجامل على حساب منتخب مصر». وأردف: «هل تتوقعوا نجاح منتخب مصر الأولمبي، استحالة، ده ملوش علاقة بالكورة خالص. ليه دايمًا بتحاولوا تكرهونا في الكورة ومش مخليينا نهتم بالكورة، ولا فرصة إننا نتابع المنتخب الأولمبي ونهتم بيه؟».