كشف الفنان أحمد صيام تفاصيل إصابته بالسرطان في الرئة منذ عام 2007، وأكد انه اصيب به بسبب كثرة تدخين السجائر. تفاصيل اصابة احمد صيام بالسرطان وقال صيام خلال لقائه ببرنامج «الستات» الذي تقدمه مفيدة شيحة وسهير جودة بقناة «النهار»: «كنت أدخن 6 علب سجائر يوميًا، كنت شرها في التدخين وفي لحظة صحيت من النوم لقيت الدنيا مهزوزة صحيًا وقتها خوفت وقررت ماشربش سجائر ورميت السجائر إللي عندي». وأضاف: «بعد ما أقلعت عن التدخين بيوم واحد قررت أذهب للطبيب وأكشف وبعد عمل التحاليل والأشعة فجأة لقيته بيقولي عندك سرطان في الرئة، وزوجة أخويا طبيبة قالت لي لازم ناخد عينة ونحلل ونمشي في طريق العلاج، قلت لها لا هنحلل ولا هنعمل ومتجبيش سيرة لحد وهنسيب الجثة مقفولة لغاية لما نسلمها لأصحابها». وتابع: «ذهبت إلى الطبيب وقال لي الورم بتاعك على فص من الفصوص الثلاثة اللي في الرئة اليمين وإحنا هندخل نشيل الفص ده قلت له تمام نعمل العملية». وأكمل احمد صيام: «مراتي وقتها عرفت هي وكل أقاربي، ولما اتقال لي عندك كانسر حسيت إني مضغوط وهاقع، وبعد شوية قلت لنفسي إيه المشكلة أخاف من الموت علشان إيه، عملت الجراحة وأنا داخل العمليات كنت باضحك وأخدت كيماوي بعد الجراحة وكل 6 شهور بعمل فحص من سنة 2007».