تحدث إبراهيم سعيد نجم الأهلي والزمالك ومنتخب مصر السابق، عن المقارنات حول مستوى إمام عاشور خلال فترة لعبه مع قطبي الكرة المصرية «الأهلي والزمالك»، مشيرًا إلى أن اللاعب حاليًا في القلعة الحمراء ومفيش لازمة من المقارنات دي مع احترامي للجميع. وقال إبراهيم سعيد في تصريحات تليفزيونية عبر برنامجه «بلس 90» المذاع على قناة النهار: «مع احترامي للجميع حتى الكابتن أحمد حسام ميدو، مهما اللعيبة أو الجماهير تتكلم عن مقارنات حول مستوى إمام عاشور مع الأهلي والزمالك، الموضوع مش فارق، دلوقتي اسمه اللاعب اسمه إمام عاشور لاعب النادي الأهلي». وأضاف سعيد: «خلاص الموضوع اتقفل، وأن الناس بتتكلم أنه مستوى أوحش أو أقل، ولكن الخلاصه إن إمام عاشور حقق بطولات في الفترة اللي قضاها مع النادي الأهلي محققهاش مع أي نادي آخر بما فيهم الزمالك، وهيشارك في كأس العالم للأندية». وتابع: «الجمهور مبسوطه بيه وبتحبه وحقق أرقام كويسة، أنا بحبه عشان لاعب كويس، لما بيبقى فايق بيفوق الفرقة، الموضوع أنه كان بيلعب في الزمالك وبعدين راح الأهلي، ده خلاص أنتهي، هو مش مركز أصلا ولو كان مركز مكنش حقق بطولات، وكل تركيزه مع الفريق». وأردف نجم الأهلي السابق: «طريقة اللعب في النادي الأهلي هتساعده، والاستقرار من حيث الإدارة واللعيبه وكل الإمكانيات متوفرة، فمن الطبيعي أنه يتألق، وعجبني أداءه في مباراة الداخلية جدًا ولسه قدامه كتير». وأشار إبراهيم سعيد، إلى أن إمام عاشور يقدر يعمل شعبية كبيرة جدًا الموضوع مختلف والله، الجماهير بتحبه وهو لاعب كبير جدًا، وممكن يضيف اسمه جنب أسماء كبيرة عملت الشعبية دي زي الخطيب وحسن شحاتة وحسام غالي، وغيرهم كتير.
