أكد أحمد سالم المتحدث الرسمي باسم نادي الزمالك، أن الزمالك خاض مباراة سيراميكا كليوباترا في الدوري بعد تحقيق مطالبه. وقال أحمد سالم في تصريحات عبر قناة «أون تايم سبورتس»: «التفاوض يجب أن يكون فيه نوع من المناورات بمعنى إما أكون عاوز أوصل لحاجه لازم أطلب أكتر منها بكتير علشان في الأخر أوصل للي أنا عاوزه». وأضاف: «مش شرط في المفاوضات أن يتم تنفيذ لي كل اللي أنا عاوزه، لأن أنا ببقى عامل حسابي لو طلبت مثلا 10 مطالب، هاخد 7 أو 8 يبقى أن الكسبان، لكن إحنا خدنا أكتر مما كنا نبحث». وواصل: «تم تنفيذ البند الأول وهو كان التحقيق مع الحكام وإيقافهم والكلام ده اتبلغنا بيه خلاص كمان خدنا ضمان أن بيريرا مش مكمل الموسم الجاي». وتابع: «البند الثاني واللي عمل ضجه بخصوص أنه تيجي لجنه من برا تعمل الجدول ده كان مقصود علشان نوصل رساله غير مباشرة لأشخاص ما أننا مش واثقين فيهم في عمل الجدول.. طيب خدنا ايه أنه الجدول في الموسم القادم سيتم وضعه بطريقة مختلفة تمامًا، لن يكون فيها نفس الطريقة ونفس الأشخاص، ونفس الأهواء الغير مريحة بالنسبة لنا، وهيكون تحت إدارة كاملة للأندية المشتركة في الدوري، وهي اللي هتحط الجدول». وأردف: «فيما يخص إعلان جدول الدوري كامل واللي كان مركون في الدرج.. أعلن يوم الاربعاء بالكامل وده مطلب كمان اتحقق». وأكمل: «البند الأخير واللي عليه اللغط كله هو عدم استكمال مباريات الدور الثاني قبل الأول والناس كلها مسكت فيه وكأن ده كان هدف الزمالك الأول، ولكن ده مكنش هدف الزمالك الأول، ولكن كان مشكلة الزمالك التحكيم والتنظيم بصفة عامة». وأتم: «إحنا كنادي الزمالك تم تحقيق لنا 3 مطالب من 4، والمطلب الرابع فيما يخص مباريات الدور الأول خدنا ضمان بعدم تكرارها في الموسم الجديد».
