علق إبراهيم سعيد، نجم الأهلي والزمالك السابق، على قرار الأبيض باستكمال بطولة الدوري المصري، بعد انسحابه من مواجهة الأحمر في القمة. وأصدر الزمالك بيانًا رسميًا أعلن خلاله استكمال بطولة الدوري، بعدما كان قد رفض أولًا مواجهة الأهلي، اعتراضًا على عدم تنفيذ مطالبه من قبل رابطة الأندية. وقال إبراهيم سعيد في تصريحات تليفزيونية: «الموقف اللي اتعمل غير مدروس، مفيش مكاسب، انت طلبت 4 طلبات، بالعكس انت خسرت 3 نقاط نتيجة الانسحاب و3 نقاط الفترة الجاية». وأضاف: «من ضمن الحاجات رئيس لجنة المسابقات موجود، رئيس لجنة الحكام موجود، أنت مفيش مكاسب، أنت خسرت بكل المقاييس». وأكمل: «توقيت البيان غلط، والشكل العام قدام جماهير الزمالك مش كويس، لأن مفيش مكاسب، بصراحة أنا عايز أعرف الهدف من البيان إيه، الموضوع كله عشان يوصل إن الزمالك هيشارك أمام سيراميكا. مفيش مصداقية قدام جمهورك، الناس كانت متوقعة إن في قرارات هتحصل وأنت خسرت». وتابع: «هو من الآخر البيان معمول كله عشان خاطر آخر سطر (ولا عزاء لسماسرة المبادئ وصناع الفتن. الزمالك أولًا)». وزاد: «حقك إنك تدافع عن ناديك، بس مع احترامي الكلمة دي مقصود بيها، اتجاه تاني خالص، تخش في نزاع مع الأهلي، لأن الكلام دا بيعمل فتن، الأهلي والزمالك ليهم كل التقدير والاحترام. أنت أخدت قرار غلط، متروحش تقوم رامي في حتة تانية في اتجاه الأهلي، أو الأهلي عنده مشكلة يقوم رامي على الزمالك». وأردف: «أنت من الآخر شكلك محرج قدام جمهورك قدام لاعبيتك وقدام الجهاز الفني، والجمهور مستفدش حاجة ولا النادي استفاد حاجة».
