وجه الإعلامي إبراهيم فايق، رسالة خاصة إلى الجماهير بشأن محمد مجدي «أفشة»، صانع ألعاب الفريق الأول لكرة القدم بالنادي الأهلي، وذلك بعد تصريحاته المثيرة للجدل في الساعات الماضية. وقال إبراهيم فايق، خلال برنامج «الكورة مع فايق»، المذاع عبر فضائية «إم بي سي مصر2»: «أنا شايف إن هناك تحامل كبير جدًا على أفشة، الانطباع اللي عندي إن في لاعب عنده مجموعة من المشاعر المختلطة بيعشق جمهور الأهلي والنادي الأهلي، عاوز يقولهم أنا مش بس جبت الجون بتاع القاضية ممكن وبقيت تاريخ أنا لسة في الملعب، عاوز يعبر عن اللي جواه مش شرط أنه يكون عبر عنه بأحسن حاجة، بس هو جواه مشاعر مختلطة أنه مش واخد حقه أوي وممكن الاستفادة منه أكتر من كده». وأضاف: «اللاعب عنده حالة ارتباك، النوعية دي من اللعيبة محتاجة المساندة مش الدبح، اللعيبة محتاجة حد يبقى فاهم كويس أنها عملت تاريخ فيطبطب عليها فلو غلطان وهناك قدر ما من الخطأ يبقى في نوع من أنواع التفاهم والتفهم». وتابع: «في حالة نفسية ظهرت على أفشة، أنا مستغرب إن إزاي الناس مشافتش أنه عنده ارتباك واضح في مشاعره تجاه إن مباراة القاضية كانت فاتحة خير عليه ولكنه لسه بيلعب». وواصل: «أفشة، إنسان قلبه أبيض ونقي وعاوز يقول للناس أنا موجود وهياخد فرصة تانية وهبقى أجمد». وأتم: «أفشة، ميقصدش يزعل حد، كلنا بنغلط وعندنا ارتباكات طبيعية، ممكن أبقى قاعد مع حد من أصحابي وانفعل عليه وبعدها أقوله متزعلش مني، أفشة في أخر الحلقة قال (منزعلوش مني)».
