في البداية أحب أشكركم على اهتمامكم بمشكلاتنا.. أنا مخطوبة لزميلي في الجامعة، وهو بيحبني جدا من زمان، وجه اتقدم لي، وإحنا لسه بندرس؛ بس هو بيشتغل مع والده في شغل خاص. في الحقيقة أنا كل مشاعري تجاهه مجرد إعجاب بسيط؛ يعني ماحبتهوش زي ما هو حبني؛ وده بسبب حاجات في شخصيته بتبعدني عنه كل ما آجي أقرب منه؛ وهي: إني ساعات باحس إن شخصيته ضعيفة معايا ومع أصحابه؛ حتى أهله؛ زي مثلًا: ممكن نبقى مختلفين في حاجة، وأبقى أنا اللي غلطانة وباتعمد ده؛ لأني عايزة أشوف رد فعله؛ بس هو مع الأسف مش بيتمسك برأيه أبدًا؛ لدرجة إني باحس إن أنا اللي بامشّي العلاقة مش هو.. ومثلًا كل ما ييجي يروح مكان، بيقول لي بطريقة باحس فيها إنه بيستأذن مني.. وبيعمل كده مع أهله، ويقول لي: ماما مارضيتش، بابا مارضيش.
طبعا أنا باتضايق؛ لأني باحس إنه مالهوش رأي وإنه لسه صغير، مش باحس برجولته إنه يكون محتويني يقول لي اعملي وماتعمليش. بالنسبة لأصحابه بيبقى الزعل بينهم تافه جدا، وبيبقى متأثر بيه أوى؛ مثلًا: اتخانق هو وصاحبه خناقة كبيرة وماكانوش هيكلموا بعض تاني؛ بسبب تيشيرت عايزين الاتنين يجيبوه؛ بس الاتنين مش بيحبوا يلبسوا زي بعض؛ فكل واحد كان عايز يسبق للمحل وياخده قبل التاني. نفسي في مرة يقول لي ماتروحيش هنا أو هنا، يفرض رأيه عليّ لما أكون غلطانة، لكن باحس إنه خايف أسيبه..
هي طبعًا حاجة جميلة إنه يحبني أوي؛ لكن أنا باحب الراجل اللي يقدر يحتويني، وهو اللي يفكّر ويحل المشكلات؛ لكن مع الأسف أنا اللي باعمل المهام دي، ومش عارفة أعمل إيه في المشكلة دي؟
