أوضح الرئيس عبدالفتاح السيسي، خلال جلسة بناء الإنسان ضمن فعاليات يوم الاحتفال بتفوق جامعات مصر، السبب وراء تدريب عدد من العاملين في الدولة سواء في قطاع التعليم أو غيره بالأكاديمية العسكرية. وقال الرئيس السيسي: «مؤخرًا، الناس بتسأل وبتقول ليه بتودي بعض الناس للأكاديمية العسكرية.. هنا هتكلم لكل المصريين، إنتم دايمًا بتقولوا في تطور كبير في المجتمع.. تطور إيجابي وفي تطور سلبي، والمدرس عايزه يبقي مهارته عاملة إيه؟ انتماؤه عامل إيه؟ استعداده عامل إيه؟.. أنا مش بشكك في مهارات ولا انتماء حد، بس إحنا بنسلم ولادنا للمعلم أو المدير وإحنا هنا بننتقي، وإحنا عندنا فرصة نبذل جهد وإنفاق أكتر عليه علشان أجهزه وأعده وأساعد في تأهيله يقوم بدوره، إحنا بندخله في برنامج عام، ولو أقدر أعمل ده في كل مؤسسات الدولة هاعمله، إحنا عايزين الجهاز الإداري للدولة أكثر التزامًا». وأكمل الرئيس كلمته: «بنحاول نحسّن أكتر، ونطور أكتر، في ظل موارد مش موجودة زي ما قال الدكتور رضا حجازي والدكتور أيمن عاشور.. لازم تختار كويس وتدرب كويس وتأهل كويس.. وبالمناسبة، التأهيل والتدريب عملية لا تنتهي للقائم بأي وظيفة أو نشاط وظيفي في التعليم والنقل السكة الحديد.. محتاج دايما برامج تدريب وتأهيل». وتابع الرئيس: «أنا بس حبيت أشير للنقطة دي عملناها مع وزارة النقل في السكة الحديد أو المترو، يدرس دراسة فنية، وكمان وزير المالية، ويحط البرنامج الفني من قبل الوزارة ومش بنتدخل فيه». وتابع الرئيس السيسي: «أنا مش بعسكر.. مفيش الكلام ده.. اللى بيقول الكلام ده دايما هدفه التشويه ويسيء ويبث السموم في قلوب وعقول الناس ويحطم الأمل في بكرة من خلال شائعات وأكاذيب وإفك يقوله للناس في ظل ظروفنا الحالية». وأضاف: «عمري ما قولت كلام معسول ولا أحلام.. ولا عمري قولت أنا هجيب معايا.. أنا قولت عمل وبس.. هنفضل نشتغل لغاية ما ربنا يوفقنا ويكرمنا».
