■ تايه لما بنام باحلم إنى تايه ومش عارف أرجع مكانى واما اصحى.. بابقى خايف أنام لحسن أتوه تانى. ■ ع القهوة ع القهوة.. فى وسط الميدان راجل عجوز نعسان قدامه شيشة وجنبه كيس دخان كل ما أعدى عليه.. ألقاه نعسان عشرين سنة خمسين سنة ستين ولحد ما اتهد المكان وهوه قاعد فى الخلا.. نعسان. ■ حبيبتى حبيبتى.. تشبه الحلم المنور لو يشوفها البحر يسكر والهوا يطير م السعادة فى عينيها الدنيا تفرح وف إيديها الورد يطرح واما تسكت واللا تسرح تبقى أجمل من إيزيس قصدى أحلى من فؤادة وأنا اللى عاشق قلبها تايه تمللى ف حبها وما ليش إرادة. ■ شوارع أنا ماشى لوحدى فجأة لوحدى.. فى شارع مليان أنغام والنسمة طرية.. والشارع ما فيهوش حد أنا ماشى لوحدى فجأة لوحدى.. فى شارع غيمان ببشر وجنان وفوق رصيفه حزن صافى وما لوش عنوان أنا ماشى لوحدى والناس ماشيين وما حدش عارف.. رايحين على فين. ■ آه ياحبيبتي آه يا حبيبتى.. السنة دى صعبة خالص المطر نازل بيبكى والسما مخضوضة جدا والديوك ما باقيتشى تدن والعسل جنب النواصى يلحسوه الحدايات والشجر زى البنات نفسه يتسبسب شوية والقمر نازل يدور فى الخرابة عن سحالى أسطورية واحنا ماشيين فى الخطر واحنا ساكنين فى الخطر ياحبيبتى.. السنة دى صعبة خالص. ■ الغربة فى الصباح.. زى كل صباح باصحى من النوم لا انا تعبان ولا مرتاح.. لكن مأزوم بعيون بتدور زى البوم والصورة بتتحرك قدامى وتحوم.. وانا بارطن بالمصرى وباعاند أساطير الروم ودموعى بتنزل على خدى تسألنى عن حلمى الوردى عن حلمى المهزوم وصوابعى بتهرب من يدى مش قادرة تشاور ولا بتطبطب ع المحروم والليل زعلان ومكشر والعالم.. ما بقاش مفهوم. ■ ليه باحبك أنا ليه باحبك.. وانتى خالية من الحنان أنا ليه باودك.. وانتى مش عايشة ف مكان أنا ليه كده.. دايما حزين بالشكل ده تايه مابين قلبك.. وبين صوت الكمان؟! ■ حاعمل إيه مش عارف حاعمل إيه لو يوم صحيت.. ولقتينى نايم ع الرصيف باشحت من الماشيين رغيف وف عز عز البرد.. لابس خفيف مش عارف حاعمل إيه لو يوم قالولى إن أنا متهم وتهمتى إنى شريف وكلامى كله خطرفة وتخريف مش عارف حاعمل إيه لو يوم ناديت على صاحبى.. مالقيتهوش واتغيرت كل الوشوش ولقيت اللى كانوا بشر.. ماباقوش مش عارف حاعمل إيه. ■ من تانى نفسى اتولد منك.. علشان تحبينى نفسى ابقى طفلك وابقى نايم جنب ضلك وانتى نايمة ترضعينى واما تصحى.. أبقى لابد جوه جلدك مستخبى ف حتة حلوة جنب رمشك تضحكى.. وتدمعينى واما اتوه فى بحر جسمك.. رجعينى.. واما اضيع فى الدنيا.. تبقى تدورى.. وتجمعينى واما اموت.. تبقى تواسينى ■ هدية قديمة باهديك من غير مابافكر كيس منديلى المتعطر ورق الأحلام المتبخر أسطورة أيامى.. وشبابيك مفتوحة بتستنظر باهديك حرمانى.. وتفاصيل غرقانة ف أحزانى وصوت مكتوم.. يظهر إنه قديم جدا وبعيد جدا.. يظهر إنه لواحد تانى باهديك.. وبافكر فيك إياك تنسانى. ■ كأنى خيال أنا عمرى ما زهقت ولا مليت ولا عمرى يوم حنيت لغيرك ولا حبيت.. وداريت دموعى عن عيون القمر ياما داريت.. ومشيت كأنى خيال حتى اسألى كل الشوارع اللى فيها مشيت اسألى الطير ع الشجر والحلم المنور اللى اختفى لما اختفيت أنا عشت ف سجنك الواسع كنت فاكر إن ليا جناحات أقدر أطير بيهم ساعات ما كنتش أعرف إن أنا اتقصيت وكنت حالف إنى أغنيلك ولما جيت أغنيلك.. بكيت
