كشف المخرج أحمد مدحت عن علاقته بالفنان الراحل هشام سليم، مؤكدًا أنه كان حساسًا ولم يتاجر بالمرض يومًا ما. وكتب عبر صفحته الشخصية على الفيس بوك منشورًا نصه: «يوم وفاة والدة الفنانة فيدرا روحنالها أنا وأيمن أخويا البيت عشان نعزيها وكان هناك المنتج كريم أبوذكري وزوجته السيدة هديل والمطربة أنوشكا والفنان حازم سمير وبعد كده جه هشام سليم وكان لابس شورت لأنه كان جاي من الجيم، هشام ما بيهموش المظاهر هو جاي يعمل الواجب وخلاص مش مهم بقي لابس ايه، الحزن في القلب مش في اللبس الغريب في الأمر أن فيدرا لاحظت انه خاسس جدا فسألته فقالها ده ستايل جديد لكن فيدرا ماقتنعتش وشكت وبعد الحاح منها اكتر من مرة وافق هشام على عمل تحاليل». وتابع: «يوم 22 سبتمبر 2020 (لاحظ التاريخ) كلمتني فيدرا قالتلي التحاليل مش مطمئنة واحتمالية وجود سرطان بالرئة، كل ده هشام ما يعرفش!! ومن اليوم ده فيدرا تولت هشام كالأم والأخت والصديقة وكل حاجة، متابعة مع الدكاترة، أشعة، تحاليل، تكلمله صحابه، قرايبه، قرت كل حاجة عن المرض الخبيث وبقت بتناقش الدكاترة في أدق التفاصيل وأصبح هشام بيعتمد عليها بشكل كبير». وأردف: «الاتنين هشام وفيدرا عنديين وعيال صغيرة، ساعات يختلفوا على حاجة هايفة فيشدوا مع بعض والاقيها مكلماني بالليل تقولي اسال على هشام عشان احنا مابنكلمش بعض، أكلم هشام ألاقيه بيقولي أخبار البت المهبوشة ايه؟ أقوله أهي زي ما هي مهبوشة يقولي خد بالك منها واستوعبها!! أقول سبحان الله الاتنين شادين مع بعض وخايفين على بعض قد ايه. بعدها بيومين ألاقيهم مكلمني انت فين؟ تعالي احنا قاعدين بنفطر في أركان أو احنا في بيت هشام وفيه فلان وفلان وفلان. في الفترة الأخيرة تدهورت حالة هشام الصحية ولما بيكون مضايق أو رايح المستشفي عشان ياخد الجرعة ( الكيماوي ) ممكن مايردش لكن بعدها بيومين ألاقيه مكلمني يقولي معلش اتاخرت على مكالمتك لكن مكانش يطنش بدعوي انه مريض أو حاجة وكان متفهم الظروف ولا عمره عاتب حد ولا لامه عشان مبيسألش ولا عمره تاجر بالمرض ولا اتمسكن أو استدر عطف من حد، كبرياءه عالي دايما عنده كرامة وبيضحك عشان مايبانش انه ضعيف ولا عمره اتصور على سرير مرض ولا حاجة من دي خالص. واستطرد: «كلمني يوم 28 يوليو اللي فات قالي انا مع يسرا وخالد اخويا في السخنة ما تجيلنا قلتله ده انا باحضر حاجاتي عشان مسافر بكره اسبانيا وقلتله انت واحشني يا H ولما ارجع عاوز اشوفك، رجعت من السفر كلمته ماردش، حاولت اكلمه اكتر من مره بس ماردش برضه كانت اكتر مرة يغيب عليا فيها وعرفت انه بيمر بفترة صحية صعبة وبعدين لقيته بيكلمني قالي ماتزعلش مني يابو حميد قلتله انا مبزعلش منك ابدا قالي اخبارك ايه قلتله انا مسافر بكره دبي عاوز حاجة قالي لا يا حبيبي شكرا عاوزك تتبسط. وقال: «الغريب أن هشام كان بيخاف عليا اوي!! وانا كنت باستغرب من ده جدا وكان بيقول لفيدرا واحمد زيتون مدير التصوير انه قلقان عليا عشان كان حاسس أن انا باعمل مجهود كبير في الشغل ومع زيادة وزني في الفترة الأخيرة كان خايف أن ده ممكن يأثر على صحتي وكان يقولي لازم تخس شوية يا ابو حميد وخف على نفسك في الشغل شوية.. مافيش حاجة تستاهل».