كشفت الفنانة هدى رمزي عن رأيها في التريند الذي انتشر خلال الأيام الماضية حول أن المرأة غير ملزمة بالرضاعة أو بشئون البيت، قائلة «رأيي لن يعجب الكل». وأضافت رمزي، في حوارها مع الإعلامية ياسمين عز في برنامج كلام الناس على قناة MBC مصر :«الأمر بقى مثير للشفقة، الموضوع وصل أن الست تلغي وجودها كأم وكربة منزل، هل ده معقول، ده حاجة تخض، أول ما قريته قعدت أضحك». وأردفت: «واضح أن البحث عن التريند هو السبب الوحيد للأمر ده، يعني ايه مترضعش، مترضعيش ومتجوزيش ومتخلفيش، والمجتمع هيرتاح أنك معملتيش كل ده، دي حاجة مثيرة للشفقة وللحزن على اللي وصلنا له، ده فراغ؟ يمكن». وعن ظهور نجمات زمان بالمايوه أجابت: «زمان كان اللبس شياكة مش استعراض، وجيلنا والجيل السابق عليه كانوا بيلبسوا قصير، ويطلعوا بمايوه على البحر، بغرض إن الموقف متطلب ده، لكن مش بغرض إظهار مفاتن جسمهم». وتابعت: «زمان مكانوش بيقفوا في أوضاع التصوير في الأفلام، إلا يمكن هند رستم وحاجة بسيطة في فيلم لأن الدور تطلب كده».
