وجهت الفنانة رانيا فريد شوقي رسالة عتاب لعدد من المسئولين، وفى مقدمتهم وزيرة الثقافة د. إيناس عبدالدايم، على عدم الاحتفاء بتاريخ فريد شوقي فى الذكرى ال 25 على رحيله. وكتبت رانيا عبر حسابها الخاص على موقع التواصل الاجتماعى فيسبوك: «همسة عتاب في الذكرى ال 25 لوفاة والدى الحبيب والفنان الكبير فريد شوقى اللي السنة اللي فاتت كانت المئوية، وفي ظروف كورونا والحمد لله ما زال في مخلصين لذكراه كان بالنسبة لهم الأب أو الأخ أو العم أو الأستاذ وكانوا فعلا بيستعدوا لعمل ذكرى تليق باسم ومكانة فريد شوقي والحمد لله تم منها جزء من خلال مهرجان الإسكندرية برئاسة الكاتب الصحفى الأمير أباظة وحبيب أبويا الكاتب الصحفى سمير الفقيه اللي بذل مجهود كبير بمهرجان الأقصر للسينما الأفريقية برئاسة السيناريست سيد فؤاد ومديرة المهرجان المخرجة عزة الحسينى وتم تكريمه من جريدة الأخبار، وطبعا مهرجان القاهرة عمل من بنها». وأضافت: «كونّا مجموعة محددة تكون هي المسئولة للاحتفال بالمئوية واتقابلنا 3 مرات وقالوا كلام يفرح القلب وخدنا الكام صورة ودمتم طبعا، القليل منهم نفذ وعوده وعلى راسى طبعا والباقى فنكوش مش هقول أسامي، لكن كل اللى هقوله الكلام سهل لكن الفعل مافيش للأسف، كلها اجتهدات فردية وغياب تام لأى مسئول وإحنا اللى كنا بنجري عشان نعمل حاجة وقبلنا وزيرة الثقافة والوزيرة مشكورة قابلتنا أنا وعبير أختى بعد زن مني واتكلمنا وقالت هنعمل احتفال في الأوبرا وبالمناسبة قولنا لها حضرتك مافيش موقع فيه ارشيف كامل عن السينما المصرية وتاريخها في معلومات كتير مغلوطة على مواقع قالت في موقع لوزارة تحت الإنشاء لتاريخ السينما الله أعلم ده تم ولا لسه». وتابعت:«وطبعا مافيش احتفال تم بكل أسف بسبب كورونا طب ما ممكن نعمل حاجات تانية كتير بعيد عن التجامعات وبعدين ازاي مافيش متحف للفنانين أو أي مبنى يجمع تاريخ السينما ومقتنيات الفنانين زي ما حصل في مقتنيات العظيم أحمد زكى طب يا جماعة يا مسئولة شوفوا الأجانب بيعملوا ايه وقلدوهم مش هقول إنكم تفكروا قلدوا اللى سباقونا في مثل بيقول من فات قديمة تاه وطول ما احنا لا نقدر ولا نذكر الأساتذة والرموز وتاريخنا السينمائى والفنى العريق كله في طي النسيان ماتزعلوش بقي من اللي بيحصل واللي لسه هيحصل ماتلموش على قلة الأخلاق وعدم الوفاء والتقدير وعدم معرفة التاريخ انا بتكلم على كل المجالات مش بس الفن نوروا الرموز وأظهروهم خلي الأجيال تعرفهم مش تاخد معلومات مغلوطة من على السيوشيال الميديا والنت». وأكدت: «يا جدعان انا شوفت بعينى واحد عامل فيديو على التيك توك بيقول أنا فريد شوقي ويوسف وهبى وأنور وجدى من الماسونين والناس كتبه تعليقات أنها مصدقة وهما أصلا مش فاهمين يعنى ايه ماسونية ده في بلاوى بتتقال على كل الرموز وطبعا احلي تسليه على الفنانين اكاذيب وفتي حسبنا الله ونعم الوكيل نرجع لكلامنا يا ناس بصوا على الخواجة واللي بيعملوه أفلام وثائقية وأفلام سينما دول عملوا احتفالاً لمرور 60 عاماً على شخصية جيمس بوند والله ما أعرفه اقول إيه، اختم بهذة السطور المقتبسة من إحدى المقالات إن الفنون تحمل خبرات وتجارب الحياة،وذلك فهي وسيلة راقية لتنوير وتعليم الإنسان، وتربية ذوقه، وحسّه الجمالى.. إن الشعب الذى تنمو فيه الفنون والآداب هو شعبٌ متطوّرٌ».
