حصل الإعلامي خالد عليش على حكم بمشاهدة ابنته 11 ساعة أسبوعيًا، وكتب عبر حسابه الشخصي على موقع التواصل الاجتماعي فيسبوك :«بحكم القانون النهاردة أنا خدت حكم تاريخي يارب يتنفذ على خير، وتاريخي لأنه أحسن حكم ممكن اخده في ظل ظروف قانون الأسرة السيئ لحين تعديله، واللي طلع الحكم قاضي مش واحد صاحبنا ف ده معناه أن الراجل قره وفهم وبيدي لكل واحد حقه، لكن جه الوقت اللي اقول فيه اللي جوايا، حسبي الله ونعم الوكيل«. واضاف «عليش» :«انا خصيم لكل واحد أو واحدة حتي يوم الحساب ساعدوا بشكل مباشر أو غير مباشر اني ما اشوفش بنتي بطريقة انسانية كل حد كبير أو صغير جريت وراه بالمكالمات عشان اشوف أي حلول ودية، حتى الحركات والجروبات النسوية اللي بيدافعو عن الست وخلاص«. وأوضح :«أي حد بيكتب تعليق وهو مش فاهم حاجة فاض بيا الكيل والعمر بيعدي واستحملت الكثير من الاتهامات الباطلة وعلاقتي ببنتي بتبوظ يوم بعد يوم، وانا ملتزم بكافة الالتزامات المادية ناحيتها من اول يوم كاملة وزيادة كمان عن المستوي المادي والاجتماعي اللي عايشين فيه ومع ذلك استحملت كتير وماردتش، انا لا حول لي ولا قوة حاولت مع كل الحلول الرسمية والغير الرسمية. وتابع: «تعبت من اللف في دوائر مغلقة، تعبت من نظرة والدي ووالدتي المريضة اللي نفسهم يشوفو حفيدتهم ومش قادر اعملهم ده، انا اوحش رجل في العالم ولكن ما استحقش اني ما يكونش عندي فرصة اتكلم واخرج معاها وافسحها عشان علاقتي بيها تبقي كويسة». واشار:«محدش يقولي انت السبب عشان سيبت ماماتها، انا ووالدتها كان في بينا عشرة طيبة وايام كتير حلوة ولكن لم يحالفنا التوفيق في النهاية وكل شئ نصيب والانفصال كان برغبتها قبل رغبتي». وأوضح: «محدش يقولي ما انتا كنت زوج وحش، يمكن مكنتش احسن زوج برغم اني عملت اللي عليا كتير واجتهدت كتير عشان اسعد الطرف التاني ولكن ده مش معناه اني انسان وحش ومستحقش فرصة تانية ومستحقش اشوف بنتي، محدش يقولي ما انتا مبسوط واتجوزت تاني». واستطرد: «انا فعلا الحمدلله زي الفل ومبسوط اني اخدت فرصة تانية ربنا يكرمني فيها واكون انسان افضل واستمتعت بحق ربنا سبحانه وتعالي والمجتمع اداهوني اني اتجوز تاني بعد انفصالي رسميا باكتر من سنة بس مش معنى كده اني ارمي طفلي مع امه ومطلوب مني انساه، محدش يقولي ما انتا كنت بتشوفها، انا فعلا مع بداية الانفصال كنت بشوفها ساعات قليلة في الاسبوع بس مع أي تصرف ما يعجبش ماماتها تقولي اصل البنت مش فاضية عندها عيد ميلاد عندها تمرين ووسط شروط كتير منها متتصورش معاها وتنزل ليها صور- متوديهاش عند اهلك- تيجي عيد الميلاد لوحدك بدون باباك أو ماماتك، حسيت في الوقت ده اني لازم استخدم التعاقد اللي بيني وبينها اللي بيقول اني اخد البنت يوم في الاسبوع، ولكن القانون اداني حق الرؤية الطبيعي الغير انساني لطفل«. واكد خالد عليش :«فضلت 5 شهور في مساومات اني معملش تنفيذ لحكم الرؤية حفاظا على البنت ولكن ماماتها صممت وبعد التنفيذ كان مهانة ومذلة للطفلة وليا بعدها مبقتش اروح وبعت انذار رسمي ليها بكده ومازلت في الاجرأت القانونية الجديدة بعد فشل المحاولات الودية اللي الحمدلله النهاردة خدت فيها حكم منطقي ومناسب، محدش يقولي ما انتا ما بتصرفش عليها ومبهدل ماماتها في المحاكم،برغم أن مش ده الموضوع بس الحمدلله الفلوس اللي الام طلبتها كنفقة ومصاريف بتوصل كل اول شهر بدون أي محاكم من اول يوم حصل بينا انفصال رسمي بدون محكمة بعقد اتفاق بينا ولو حصل دخول محاكم في اول الخلاف ف الام اللي بدأته وده بالتواريخ مش بالكلام«. وأضاف: «موضوع أن في مصاريف زيادة بتطلب بشكل مبالغ فيه دي قصة تانية فيها نقاش وحوارات كتير ومع ذلك قولت انا عندي استعداد لأي زيادة غير منطقية بس نقعد ونتناقش، محدش يقولي روح شوفها عند جدتها عشان انا مش هاعرف يبقي في علاقة طيبة بيني وبين بنتي وانا قاعد معاها ساعة عند جدتها وهما قاعدين جنبي وقعدتي تبقى كلها مذلة ومهانة». وتابع :«محدش يقولي انتا بتتظاهر انك عايز تشوف بنتك لكن انت مش فارق معاك،الأبهات هنا اللي هيحسو قد ايه دي حاجة مؤلمة وانا مش محتاج اعمل ده وطول الوقت طلبت من أي حد قريب منهم أن احنا ننزل ونقعد ونوصل لحل وسط انا مش طالب فيه غير اني اخد بنتي يوم في الاسبوع اخرجها وارجعها، انا نفسي احس بحضن بنتي بقالي اكتر من سنة ومقعدش اتكلم في مشاكل حصلت من سنين، انا اوحش رجل في العالم بس حقي اخد فرصة عشان تكون في علاقة كويسة بيني وبين بنتي، حسبي الله ونعم الوكيل«.
