علق الفنان تامر حسني على مقطع الفيديو الذي أطلقه عدد من طلاب الثانوية العامة بالإسكندرية، أعربوا خلاله عن حبهم له واعتباره قدوتهم في الحياة، وأنهم يأخذون منه الطاقة الإيجابية، خاصة وقت ضغط المذاكرة. الأمر الذي قرر فيه تامر حسني أن يرد على الطلاب من خلال مقطع فيديو عبر صفحته على موقع إنستجرام، وكتب قائلأ: «طلاب وأساتذة الثانوية العامة بالإسكندرية، مش عارف أقولكم قد إيه فرحت بكلامكم وباللي شوفته في الفيديو من محبة صادقة وتأثير صادق وحقيقي بينا، شكرًا لكل طالب حس بكلمة إيجابية مني، وأثرت فيا سواء في كلامي أو أغانيا أو أفلامي، شكرًا لكل مدرس حط رسايلي الصادقة ليكم في عين الاعتبار وخاطبكم بيها». وأضاف: «أحمد لله أن علاقتنا مش مجرد فنان وجمهور لا دي علاقة أكبر من كدا، ودي العلاقة اللي حلمت بيها من صغري، بقدر الإمكان بخرجلكم من رحلتي كل ما هو إيجابي ليكم بنصيحة من نصيحة أخ إلى كلمة تحفيزية واللي جاي مني ليكم أكتر بإذن الله، وواثق أنه هيوصل لقلوبكم عشان زي ما قولتلكم زمان اللي بيطلع من القلب بيوصل للقلب، شكرا شكرًا طلاب إسكندرية وشكرًا شباب إسكندرية العظيم، شكراً شباب مصر، أم الدنيا يارب». وتابع: «كلكم ناجحين واللي عنده خطأ يصلحه الحياه لسه قدامكم والوقت لسه في ايدكم أي صعب هيعدي وبكرا تنجحوا وتبقوا اصحاب قصص حياه جميله كل واحد فيكم لازم يبقى بطل في قصة حياته عشان كدا متزعلوش من أي صعب وأي اخطاء وأي فشل في أي اتجاه الحياه رحله ومشوار طويل مش موقف ولا موقفين، والحل الوحيد اننا ننجح ونعتمد على نفسنا وتتعلموا انكم متسندوش على اشخاص عشان لو مشيوا متقعوش اسندوا على،، اولاً ايمانكوا بربنا دا اهم واقوى سند تاني حاجه اسندوا على حلمكم ومجهودكم ونجاحكم اسندوا على قوتكم انتوا وهقولهالكوا تاني احنا في زمن صعب لو احتاجت ايد تسندك وتدفيك امسك ايدك التانيه برغم أن في كتير طيبين بس الحياه تلاهي واللي سندك مره مش هيسندك التانيه، وكمان جه دوركوا أنكم تفرحوا أهاليكم وتكونوا أنتوا سندهم عشان لما بيكبروا هما اللي قلوبهم بتتحول قلوب أطفال وبتحتاج رعاية منكم انتوا بيبقوا محتاجين أنكم تردولهم اللي عملوه معاكم وانتوا صغيرين، معلش طولت عليكم وعارف أن من سمات العصر انكم مش بتحبوا تقروا الكلام الكتير بس انا عارف كلامي رايح لمين رايح للّي محتاجينه ومستنيينه فا هيقروه كويس جداً عشان من كل قلبي لحبايب قلبي وأن شاء الله هشوفكوا قريب بالتوفيق يا امل مصر». View this post on Instagram A post shared by Tamer Hosny (@tamerhosny)
